- वि.सं २o७९ पौष २२ शुक्रबार
सिटिजन लाइफ इन्स्योरेन्स कम्पनीले म्याग्दी जिल्लामा बिमा सचेतनासम्बन्धी विभिन्न कार्यक्रमहरू सम्पन्न गरेको छ । सदरमुकाम बेनी बजारमा कम्पनीका ब्रान्ड एम्बासडर कलाकारद्वय मदनकृष्ण श्रेष्ठ र हरिवंश आचार्यका साथै म्याग्दीका जनप्रतिनिधि, विभिन्न विद्यालयका प्रधानाध्यापकलगायतको उपस्थितिमा कार्यक्रम समापन गरिएको हो ।
बेनी बजारमा करिब तीन सयजनाको सहभागितामा बिमा सचेतनासम्बन्धी र्याली प्रदर्शन गर्दै कार्यक्रमको सुरुवात भएको थियो । कार्यक्रममा महजोडीले जीवन बिमा भविष्यको बचत र आपतको सहयोगी भएकाले जीवन बिमाको पहुँच हरेक नागरिकसम्म पुर्याउन जरुरी रहेकोमा जोड दिएका थिए । कम्पनीका प्रमुख कार्यकारी अधिकृत पोषकराज पौडेलले मानिसका चिन्ता र चुनौतीलाई व्यवस्थापन गर्ने सोचका साथ बिमाको अवधारणा विकास भएको बताउँदै बिमाको पहुँचलाई विस्तार गर्नुपर्नेमा जोड दिएका थिए ।
एक करोड मृत्यु दाबी रकम भुक्तानी
कम्पनीको म्याग्दी शाखाले एकजना दिवंगत बिमितका परिवारलाई एक करोड रुपैयाँ मृत्यु दाबी रकम भुक्तानी गरेको छ । बिमा सचेतना कार्यक्रममा अन्नपूर्ण गाउँपालिका–६, घारका दिवंगत कृष्ण बरुवालको परिवारलाई एक करोड ५० हजार रुपैयाँ हस्तान्तरण गरिएको हो ।
सिटिजन शुभारम्भ बिमा योजनाअन्तर्गत असार ३१ गते जीवन बिमा गरेका बरुवालको मंसिर २१ गते बेनीमा क्याम्पस भवन निर्माण योजनाको नापजाँचका क्रममा ढिस्कोले पुरिएर मृत्यु भएको जनाइएको छ ।
५० लाख रुपैयाँको बिमालेख पोलिसी खरिद गरेका बरुवालको परिवारलाई बिमांक रकम ५० लाख रुपैयाँ, दुर्घटना मृत्यु लाभबापतको ५० लाख रुपैयाँ र किरिया खर्चबापतको ५० हजार रुपैयाँ गरी एकमुस्ट एक करोड ५० हजार रुपैयाँ हस्तान्तरण गरिएको म्याग्दी शाखा प्रमुख भावना पौडेल सुवेदीले जानकारी दिइन् ।
