- वि.सं २o८१ बैशाख २० बिहीबार
संखुवासभामा निर्माण सम्पन्न भएको १४.९ मेगावाट क्षमताको मायाखोला जलविद्युत् आयोजनाको उद्घाटन भएको छ । बुधबार प्रतिनिधिसभाका सांसद विनोद चौधरीले जलविद्युत् आयोजनाको औपचारिक उद्घाटन गरेका हुन् । उद्घाटनपछि चौधरीले नेपाल जलविद्युत्मा धनी रहेको बताउँदै यसको सही सदुपयोग गरी नेपाली जनताले लाभ लिन सक्नुपर्ने बताए ।
जलविद्युत् क्षेत्रमा अत्यन्तै सम्भावना बोकेको जिल्ला भएकाले संखुवासभाले जलविद्युत्बाट आर्थिक समृद्धि हासिल गर्न सक्ने उनको भनाइ थियो ।
आयोजना जिल्लाको धर्मदेवी नगरपालिका वडा नम्बर ३, ४ र ५ मा पर्छ । आयोजनाको लागत दुई अर्ब ५० करोड रुपैयाँ रहेको छ । त्यसमध्ये विद्युत् विकास कम्पनी पशुपति इनर्जी डेभलपमेन्ट प्रालिको ५१ प्रतिशत र बाँकी ४९ प्रतिशत मायाखोला कम्पनी लिमिटेड र स्थानीयको सेयरमा आयोजना निर्माण भएको हो ।
हालसम्म संखुवासभाका विभिन्न खोलाबाट करिब २२ मेगावाट विद्युत् उत्पादन भइसकेको छ ।
