- वि.सं २o७९ पौष १ शुक्रबार
नेपाली राष्ट्रिय क्रिकेट टोलीमा मुख्य प्रशिक्षक मनोज प्रभाकरले बिहीबार पदबाट राजीनामा दिएका छन् । नेपाल क्रिकेट संघ (क्यान)ले मुख्य प्रशिक्षक प्रभाकरको राजीनामा स्वीकृत भएको जनाएको छ । प्रभाकर गत सोमबार बिहान भारत फर्केका थिए । प्रभाकरले भारतबाटै क्यानलाई राजीनामा पत्र पठाएका हुन् ।
क्यानले आइसिसी विश्वकप लिग २ मा नेपालको प्रदर्शन खराब भएपछि प्रशिक्षक प्रभाकरसँग गत आइतबार राजीनामा मागेको थियो । त्यसको भोलिपल्टै (सोमबार) उनी भारततर्फ लागेका थिए । क्यान र प्रभाकरबीच एक वर्षको सम्झौता भएको थियो । तर, क्यानसँगको सम्झौता पूरा नहुँदै प्रभाकरले पदबाट राजीनामा दिएका हुन् । उनको प्रशिक्षणमा खेलाडीबीच गुटबन्दी मौलाएको थियो । खेलाडीसँगको सम्बन्धदेखि प्रदर्शनसम्म प्रभाकरले सुधार गर्न सकेनन् ।
गत साउनमा पुबुदु दासानायकेले राजीनामा दिएपछि क्यानले प्रभाकरलाई नेपाली राष्ट्रिय टोलीको मुख्य प्रशिक्षक नियुक्त गरेको थियो । भारतका पूर्व अलराउन्डर प्रभाकर रणजी ट्रफी विजेता प्रशिक्षक हुन् । क्यानले प्रभाकरलाई मासिक १५ हजार डलरसहित अनुबन्ध गरेको थियो ।
नेपाली टोलीका मुख्य प्रशिक्षकका रूपमा प्रभाकरले गतिलो नतिजा दिलाउन सकेनन् । यसै महिना नेपालले नामिबियामा आइसिसी विश्वकप लिग २ को सिरिजमा एउटै खेल जित्न सकेन । प्रभाकरको प्रशिक्षणमा नेपालले तीन एकदिवसीय र पाँच टी–२० अन्तर्राष्ट्रिय शृंखलाका लागि केन्या भ्रमण गरेको थियो । नेपालले केन्यालाई टी–२० मा ३–२ ले र एकदिवसीयमा ३–० ले हराएको थियो ।
