मेसी र रोनाल्डो मनपर्छ

विश्वकपको नकआउट चरणका खेलहरू निकै रोमाञ्चक लागिरहेको छ । मलाई लियोनल मेसी र रोनाल्डो दुवै उत्तिकै मनपर्छ । तर, क्वार्टरफाइनलमा मोरक्कोसँग पोर्चुगल हारेपछि दुःख लागेको छ ।

अहिलेसम्म मेसीले र रोनाल्डोले विश्वकप जित्न नसकेकाले यसपटक दुईमध्ये एकले ट्रफी उचाल्नुपर्छ भन्ने मलाई लागेको थियो । तर, पोर्चुगल बाहिरिएकाले अब मेरो समर्थन अर्जेन्टिनालाई रहनेछ ।

पहिलो खेल हारेर पनि त्यसपछि फेरि राम्रो प्रदर्शन गरेर अर्जेन्टिनाले सेमिफाइनलमा स्थान बनाएको छ । हरेक जितमा मेसीको भूमिका निर्णायक देखिएको छ । त्यसैले मलाई अर्जेन्टिनाको खेल हेर्न मज्जा लागिरहेको छ । 

ब्राजिल पनि राम्रो थियो । त्यसैले नियमित रूपमा ब्राजिलको खेल हेरिरहेको थिएँ । ब्राजिल क्रोएसियासँग हार्दा निकै नमज्जा लाग्यो । अर्जेन्टिना, ब्राजिल र पोर्चुगलका खेल नियमित हेरे पनि मैले समय अभावका कारण सबै खेल हेर्न पाइरहेकी छैन ।

यद्यपि, कुन देशले जित्यो भनेर अपडेटचाहिँ राख्छु । फुटबलले शारीरिक रूपमा पनि तन्दुरुस्त रहन मद्दत गर्छ । कहिलेकाहीँ फुटसल प्रतियोगिता हुँदा म आफैँ पनि खेल्ने गर्छु । फुटबलले आपसी एकता र भाइचारा बढाउन सहयोग गर्छ भन्ने लाग्छ ।