- वि.सं २o८१ जेठ १ मंगलबार
पूर्वी नवलपरासीमा बिहान ११ बजेसम्म १० प्रतिशत मत मात्र खसेको छ । जिल्ला निर्वाचन कार्यालय नवलपुरका प्रमुख लालप्रसाद भुसालले जिल्लामा सबै ठाउँमा गरी बिहान ११ बजेसम्म १० प्रतिशत मत खसेको जानकारी दिए ।
पूर्वी नवलपरासीमा प्रतिनिधिसभा सदस्यका दुई तथा प्रदेश सभा सदस्यका चार क्षेत्रका लागि मतदान भइरहेको छ । यहाँ ६८ उम्मेदवार चुनावी प्रतिस्पर्धामा छन् । दुई लाख ६० हजार चार सय ६१ जना मतदाता रहेको पूर्वी नवलपरासीमा एक सय १३ मतदान स्थल र तीन सय दुई केन्द्रबाट मतदान भइरहेको छ ।
शान्तिपूर्ण रूपमा मतदान अघि बढिरहे पनि बिहानको समयमा मतदाताको उपस्थिति भने न्युन पाइएको छ । नवलपुरका प्रमुख जिल्ला अधिकारी सुमन घिमिरेले नवलपुरमा अहिलेसम्म शान्तिपूर्ण रूपमा मतदान भइरहेको जानकारी दिए । बिहान ७ बजेदेखि सुरु भएको मतदन साँझ ५ बजेसम्म चल्नेछ । साँझ ५ बजेभित्र मतदानस्थलमा प्रवेश गरेकाहरूले मत खसाल्न पाउनेछन् ।
