- वि.सं २o८१ चैत २१ बिहीबार
टोखाको झोरमा बरामद २५ करोड रुपैयाँको असली मालिक सुन तस्करीमा संलग्न सिन्धुपाल्चोक भोटेकोसी गाउँपालिका– ४ का नारायण पौडेलको रहेको खुलेको छ । काठमाडौं अपराध अनुसन्धान कार्यालयले गत ४ चैतमा झोरबाट २५ करोड १९ लाख २४ हजार ९५० रुपैयाँ बरामद गरेको थियो । घटनाको अनुसन्धान गर्ने क्रममा बरामद रकमको मालिक पौडेल रहेको खुलेको हो ।
नारायण भोटेकोशी गाउँपालिकाका पूर्वअध्यक्ष राजकुमार पौडेलका दाजु हुन् । राजकुमार ०७४ माघमा भएको २२ किलो सुन तस्करीमा संलग्न थिए । त्यसवेला नेपाल प्रहरीको केन्द्रीय अनुसन्धान ब्युरो (सिआइबी)ले राजकुमारसहित ११ जनाविरुद्ध मुद्दा चलाएको थियो । सो घटनामा नारायण पनि संलग्न रहेको प्रहरीको निष्कर्ष थियो । त्यसबाहेक नारायण विदेशी विनिमय अपचलन तथा रक्तचन्दन तस्करीमा पनि दोषी ठहर भएका प्रतिवादी हुन् ।
विभागका महानिर्देशक चण्डीप्रसाद घिमिरेले टोखाबाट बरामद २५ करोड रुपैयाँको असली मालिक नारायण पौडेल रहेको बताए । ‘गत ४ चैतमा झोरबाट बरामद २५ करोड रुपैयाँको अनुसन्धान गर्दै जाँदा सिन्धुपाल्चोकका नारायण पौडेल संलग्न रहेको खुल्यो । बरामद रकम उनकै रहेको हाम्रो अनुसन्धानले देखाएको छ,’ उनले भने ।
विभागले घटनाको अनुसन्धान १२ चैतदेखि गरेको थियो । नारायण रकम बरामदलगत्तै फरार भएका थिए । घटनामा संलग्न रहेको तथ्य खुलेपछि विभागले उनको खोजी गरेको थियो । यस क्रममा विभागका कर्मचारी टोखा नगरपालिका– १ महादेवटारस्थित उनको निवास पनि पुगेका थिए । विभागको टोलीले उनको निवासमा केही दिन एम्बुस पनि थापेको थियो । उनी आउन सक्ने अवस्था नभएपछि विभागले खनतलासी गरेको थियो । तर, निवासमा घटनालाई सपोर्ट गर्ने कुनै सामग्री फेला पर्न सकेन । फरार रहेका उनीविरुद्ध विभागले अदालतबाट पक्राउ आदेश लिइसकेको छ । तर, उनी हाल फरार छन् ।
‘घटनामा संलग्न रहेको खुलेपछि नारायणलाई पछ्यायौँ । यस क्रममा उनको घरमा पनि पुग्यौँ, तर उनी फेला परेनन् । उनको घर खनतालासी भएको छ । अनुसन्धानमा आवश्यक देखिने सबै प्रक्रियालाई फलो गरेका छौँ । आशा छ केही दिनभित्रै उनी पक्राउ पर्नेछन्,’ विभागका महानिर्देशक घिमिरेले भने ।
नारायण पौडेल त्रिभुवन अन्तर्राष्ट्रिय विमानस्थलबाट तस्करी भएको ३३ किलो सुन प्रकरणमा पनि जोडिएका थिए । उनका दाजु बच्चु पौडेल सो काण्डमा जोडिएका थिए । नारायण अहिले माओवादीमा आबद्ध छन् । उनका भाइ राजकुमार माओवादीकै टिकटमा भोटेकोशी गाउँपालिकको अध्यक्षमा निर्वाचित भएका थिए । ०७९ को निर्वाचनमा पनि उनी सोही गाउँपालिका अध्यक्षमा उठेका थिए । तर, उनी कांग्रेसका उम्देवार पासाङ नुर्बु शेर्पासँग पराजित भएका थिए । बच्चु भने कांग्रेसको राजनीतिमा सक्रिय छन् । उनका अर्का दाजु ध्रुव पौडेल एमालेमा आबद्ध छन् । उनी ०७४ को स्थानीय निकाय निर्वाचनमा सिन्धुपाल्चोक फुल्पिङकट्टी गाउँपालिकाको अध्यक्ष भएका थिए ।
अपराध अनुसन्धान कार्यालयले रकमसहित भोटेकोशी गाउँपालिका– १ का ४३ वर्षीय फुच्चे भनिने कुसाङ लामालाई पक्राउ गरेको थियो । कुसाङले ना.७ख १६५२ नम्बरको ट्रक लुकाएर विभिन्न दरका अमेरिकी डलर र युरो केरुङतर्फ लैजान खोजेका थिए । सोही क्रममा अनुसन्धान कार्यालयबाट खटिएको प्रहरी टोलीले ट्रकसहित कुसाङलाई पक्राउ गरेको थियो । ट्रक खनतलासी गर्दा अमेरिकी डलर सय दरका तीन हजार ११९, ५० दरका १७९, युरो पाँच सय दरका ११, दुई सय दरका ४८०, सय दरका चार हजार १४८ र ५० दरका १७ हजार १७७ बरामद भएको थियो ।
विभागले विदेशी विनियम कसुरसहित संगठित अपराध कसुरअन्तर्गत पनि घटनाको अनुसन्धान गर्ने तयारी गरेको छ । त्योसँगै सम्पत्ति शुद्धीकरण कसुर पनि आकर्षित हुने विभागका महानिर्देशक घिमिरेले बताए । ‘यो घटना सामान्य प्रकृतिले भएको देखिन्न, ठूलै गिरोह यसमा संलग्न भएको देखिन्छ । त्यसैले संगठित अपराधमा अनुसन्धान प्रक्रिया अघि बढाउने निष्कर्षमा विभाग पुगेको छ । त्यसबाहेक सम्पत्ति शुद्धीकरण कसूर पनि यसमा आकर्षित हुन्छ,’ उनले भने ।
