- वि.सं २o८१ चैत २२ शुक्रबार
काठमाडौं उपत्यकामा बागमतीसहित चार नदीखोलाबाट १४३ टन फोहोर संकलन गरिएको छ । गत १२ वैशाखबाट थालिएको नदी सरसफाइ अभियानमार्फत चार नदीखोलाका १६ ठाउँमा सरसफाइ गरेर फोहोर संकलन गरिएको फोहोरमध्ये ६८.९३८ टन प्लास्टिक रहेको क्लिन अफ नेपालका कार्यकारी निर्देशक रवीन्द्र लामिछानेले बताए ।
प्लास्टिक, सिसा, कपडा र अन्य सामग्री संकलन गरिएको हो । संकलन भएको १४३ टनमध्ये बायोकम्प नेपालले ६८.९६ टन प्लास्टिक पुनर्चक्रणका लागि उपयोग गर्नेछ । बायोकम्प नेपालले १७ मार्च २०२५ मा सिमरामा नयाँ प्लास्टिक पुनर्चक्रण केन्द्र सञ्चालनमा ल्याइसकेको छ । बाँकी फोहोर टेकुस्थित फोहोर ट्रान्सफर स्टेसन र ललितपुर ट्रान्सफर स्टेसन हुँदै ल्याल्डफिल साइटमा पठाइएको लामिछानेले बताए ।
बायोकम्प नेपालले पिपल इन निड र क्लिन अप नेपालसँगको साझेदारीमा सञ्चालित रिभर प्लस परियोजनाअन्तर्गतको नदी सरसफाइ अभियानबाट गत बुधबार मात्र ललितपुर महानगरपालिका– ४ स्थित बागमती करिडोर क्षेत्रमा सरसफाइ गरिएको छ, त्यहाँबाट तीन हजार ४१८.१३० केजी फोहोर संकलन भएको जनाइएको छ ।
