- वि.सं २o८१ पौष १९ शुक्रबार
बर्दीबास नगरपालिकामा फोहाेर प्रशोधन केन्द्र स्थापना भएको छ ।
नगरमा दैनिक उत्पादन हुने फोहाेर व्यवस्थापन गर्न नगरपालिकाले फोहाेर प्रशोधन केन्द्र स्थापना गरेको हो । केन्द्र स्थापनासँगै फोहाेर व्यवस्थापनमा सहज भएपछि नगरवासी खुसी भएको बर्दीबास नगरपालिका– ३ का स्थानीय मनोज थापाले बताए। फोहाेर प्रशोधन केन्द्र यही पुस ५ गतेबाट सञ्चालनमा ल्याइएको हो ।
यसअघि फोहाेर यत्रतत्र फालिँदा दुर्गन्धित हुनुका साथै विभिन्न रोग फैलिने सम्भावना रहेको थियो । हाल केन्द्र स्थापना भएपछि नगर सफा हुन थालेको बर्दीबास नगरपालिका– १४ का निकेश खनालले बताए।
बर्दीबास नगरपालिकाले हिट्टा हेब्वी मेसिनरी एन्ड रिसाइकल प्रालिको सहयोगमा बर्दीबास नगरपालिका– ८ मा जापानिज प्रविधिको फोहाेर प्रशोधन केन्द्रको स्थापना गरेको हो ।
नगरपालिकाले उक्त कम्पनीसँग रु. एक करोड २० लाखमा २० वर्षको सम्झौता गरेको छ । नगरपालिकाले पूर्वाधार तयार गरिदिएको बर्दीबास नगरपालिका प्रमुख प्रह्लादकुमार क्षेत्रीले बताए।
सामान्य घरपरिवारबाट रु. ५० र होटेल रेस्टुरेन्टबाट फोहाेरको परिमाणअनुसार बढीमा रु. तीन हजार मासिक शुल्क लिने गरेको फोहाेर प्रशोधन केन्द्रका प्रबन्धक सुरेन्द्र साहले जानकारी दिए।
हाल दैनिक ६ टन फोहाेर प्रशोधन केन्द्रमा जलाउन थालेको र यसले नगरभित्रका फोहाेर व्यवस्थापनमा सहज भएको बर्दीबास नगरपालिकाका प्रमुख क्षेत्री बताउँछन् । रासस
