- वि.सं २o८१ पौष १९ शुक्रबार
सफ्टवेयर तथा प्रविधि विकासमा काम गर्ने एफवान सफ्ट कम्पनीको बैंक खाताबाट तीन करोड ५१ लाख ५० हजार लाख रुपैयाँ चोरीमा प्रहरीले नौ जनालाई पक्राउ गरेको छ । कम्पनीको अनलाइन बैंकिङ प्रणाली ह्याकिङ गरी खाताबाट पैसा चोरी भएको हो । तर, कसरी चोरी भयो भन्ने अझै रहस्यमै छ ।
सिटिजन्स बैंक इन्टरनेसनलमा रहेको खातामा भएको यस्तो ह्याकिङमा अन्तर्राष्ट्रिय समूह संलग्न रहेको आशंका गरिएको छ । प्रहरीले सो खाताबाट पैसा गएका विभिन्न नौजनालाई पक्राउ गरी थप १५ जनालाई फरार प्रतिवादी बनाएर शुक्रबार जिल्ला अदालत, काठमाडौंमा मुद्दा दायर गरेको छ ।
प्रहरीले त्रिगुणरत्न बज्राचार्य, राहुल ठाकुर, पुरुषोत्तम साह, कृष्णरमण राउत, सञ्जीवकुमार शर्मा, कमल थापामगर, दीपक थापामगर, सन्देश राई र सागरकुमार साहलाई पक्राउ गरेको हो ।
त्यस्तै, मनोज श्रेष्ठ, मुकेश मुखिया, सुरजकुमार महतो, सुजता थापामगर, सरू राई, राकेशकुमार महतो, दीपमालाकुमारी कुशवाह, प्रतीक चौधरी, सलन लिम्बू, सपनाकुमारी सिंह, अनु सोराली, अविनाश रौनियार, दर्शन लिम्बू, विवश याखा र सजन अमात्यलाई फरार प्रतिवादी बनाएको छ । एफवान सफ्टको खाताबाट उनीहरूको नाममा पैसा गएको आधारमा प्रहरीले उनीहरूलाई प्रतिवादी बनाएको हो । तर, बैंक खाता कसरी ह्याकिङ भयो र कसले गर्याे भन्ने खुल्न नसकेको साइबर ब्युरोले जनाएको छ ।
कर्पाेरेट बैंकिङ प्रणालीमा अनधिकृत रूपमा पहुँच पुर्याएर खाताबाट रकम चोरी भएको हाे । यसरी चोरी गरिएको रकम नेपालमै विभिन्न व्यक्तिको खातामा लगिएको थियो । कतिपयको टिकटबापतको रकम भुक्तानी गरिएको छ । वैदेशिक रोजगारीमा रहेकाहरूलाई हुन्डीको कारोबार मिलाउन नेपालको खातामा पैसा हालिएकाले यसमा अन्तर्राष्ट्रिय गिरोहकै संलग्नता देखिएको प्रहरी अधिकारी बताउँछन् । केहीलाई टेलिग्राममार्फत रोजगारीको बहानामा उनीहरूको खातामा पैसा हालिएको थियो।
