- वि.सं २o८१ पौष ३ बुधबार
नेपाल प्रिमियर लिगमा पहिलो खेल खेलिरहेका भारतीय जयकिशन कोस्लावालाले अर्धशतक बनाएका छन् । बुधबार कीर्तिपुरस्थित त्रिवि क्रिकेट मैदानमा जयकिशनले ३६ बलमा ६ चौका र दुई छक्कासहित ५० रन बनाएका हुन् ।
उनले ११.३ ओभरमा अर्धशतक बनाउँदा कर्णालीले दुई विकेट गुमाएर ८६ रन बनाएको छ । तेस्रो विकेटका लागि जयकिशनले विलियम बासिस्टोसँग ५० रनको साझेदारी पनि गरेका छन् ।
यसअघि भारतीय चर्चित खेलाडी शिखर धवनले कर्णाली याक्सका लागि चार खेल खेलेर घर फर्किएका थिए । उनको स्थानमा जयकिशनलाई कर्णाली याक्सले मंगलबार राति मात्रै टिममा समावेश गरेको हो ।
एनपिएलमा पहिलो खेल खेलेका भारतीय जयकिशन कोस्लावालालाई कर्णालीले ओपनिङमा पठाएको थियो । ३५ वर्षीय गुजराती खेलाडीले यसअघि सन् २०१८ मा ललितपुर प्याट्रिओट्सका लागि इपिएल उपाधि जिताएका थिए ।
फाइनलमा ५७ रन बनाएका थिए । एनपिएलमा बनेको यो २३औँ अर्धशतक हो । यसअघि लिग चरणमा एक शतकसहित २२ अर्धशतक बनेका थिए ।
