निर्वाचनलाई लक्षित गरी मदिरा बिक्री वितरण रोक्ने अभियानमा रहेको नेपाल प्रहरीले झन्डै २९ हजार लिटर घरेलु मदिरा बरामद गरी नष्ट गरेको छ । नष्ट गरिएकोमध्ये १६ हजार पाँच सय ३० लिटर कच्चा पदार्थ र १२ हजार तीन सय ५३ लिटर तयारी मदिरा छ ।
प्रहरी परिसर काठमाडौंका प्रवक्ता एसपी दिनेश मैनालीले कच्चा पदार्थ र तयारीसहित २८ हजार आठ सय ८३ लिटर घरेलु मदिरा नष्ट गरिएको जानकारी दिए । काठमाडौंका काँठ र बौद्ध क्षेत्रबाट धेरै घरेलु मदिरा बरामद भएको प्रहरीले जनाएको छ ।
मदिराले निर्वाचनको वातारणसमेत बिथोल्न सक्ने देखिएपछि कारबाहीमा उत्रिएको जिल्ला प्रहरी परिसर काठमाडौंले जनाएको छ । उनले भने, ‘ठूलो मात्रामा घरेलु मदिरा नष्ट गरिएका छन् । मापसे गरी सवारी दुर्घटना भएको भेटियो । झैझगडा गरी समाजमा अशान्ति मच्चाउने, घरेलु हिंसा गर्ने र आफन्तलाई समेत धारिलो हतियार प्रहार गरी ज्यान लिनेसम्मका घटना भएका पाइयो । त्यसो हुँदा घरेलु मदिरा नियन्त्रणमा प्रहरी उत्रिनुपर्यो । यो अभियान अझ कडा परिनेछ ।’
