वाणिज्य आपूर्ति तथा उपभोक्ता संरक्षण विभागले दैनिक उपभोग्य वस्तुको रूपमा प्रयोग हुने साधारण प्रशोधित पानीको अधिकतम खुद्रा मूल्यभन्दा बढी लिए कारबाही गर्ने चेतावनी दिएको छ । विभागले मंगलबार प्रशोधित पानीको अधिकतम खुद्रा मूल्य सम्बन्धमा संघीय संसद्, प्रतिनिधिसभा, उद्योग तथा वाणिज्य र श्रम तथा उपभोक्ता समितिबाट गठित बजार अनुगमनसहितको छलफलमा तोकिएको अधिकतम मूल्य लागू गर्न व्यवसायी तथा पानी उद्योगीलाई निर्देशन दिएको हो ।
उपत्यकाभित्र एक लिटर बोटलको पानीको अधिकतम खुद्रा मूल्य १६ रुपैयाँ छ । तर, खुद्रा पसलले उपभोक्ताबाट २० रुपैयाँदेखि २५ रुपैयाँसम्म लिँदै आएका छन् । त्यस्तै, २० लिटरको जारको पानी अधिकतम खुद्रा मूल्य ४७ रुपैयाँ तोकिएको भए पनि ५० देखि ६० रुपैयाँसम्म उपभोक्ताले तिर्दै आएका छन् । त्यस्तै, उपत्यकाबाहिर एक लिटर पानीको बोटलको मूल्य २० रुपैयाँ तोकिएको भए पनि उपभोक्ताले २५ देखि ३० रुपैयाँसम्ममा किनेर खान बाध्य छन् । वाणिज्य विभागले तोकिएको अधिकतम (एमआरपी) मूल्यभन्दा बढी लिने गरेको पाइए तत्काल कारबाही गर्ने जानकारी दिएको छ ।
उद्योगी, विक्रेता, खुद्रा पसलले अधिकतम मूल्यभन्दा बढी लिए–नलिएको अनुगमनको कार्यलाई तीव्र बनाइने विभागका महानिर्देशक महेश भट्टराईले जानकारी दिए । मूल्यभन्दा बढी रकम तिरेर पानी खरिद नगर्न र कसैले जबर्जस्ती बढी रकम लिन खोजेमा विभाग वा मातहतका कार्यालयमा, सम्बन्धित जिल्ला प्रशासन कार्यालय, इलाका प्रशासन कार्यालय र स्थानीय तहमा सूचना दिन पनि सकिने भट्टराईले बताए । उनले भने, ‘हामी उपभोक्तालाई पनि भन्छौँ, बोटल वा जारकोे पानीमा तोकिएको अधिकतम मूल्यभन्दा बढी नतिर्नुस्, बढी लिएको पाइए तत्काल कारबाही गर्छौं ।’
बोटल वाटर उद्योग संघका अध्यक्ष ध्रुब गौतमले उद्योगी र विभागको समन्वयमा मंगलबारबाट अनुगमन गर्ने जानकारी दिए । उनले भने,‘सरकारले तोकिएको मूल्य १६ रुपैयाँ हो, उपभोक्ताले २० रुपैयाँ तिरेर खान बाध्यछन्,एमआरपी मूल्यभन्दा बढी मूल्यमा बेचेको पाइएकोहुँदा नै विभागसँगको समन्वयमा अनुगमन गर्न
लागेका हौँ ।’
