पाँचदलीय सत्तागठबन्धनमा जाने प्रयास टुंगोमा पुग्न नसकेपछि महन्थ ठाकुर नेतृत्वको लोकतान्त्रिक समाजवादी पार्टी (लोसपा) मधेसकेन्द्रित दलहरूको गठबन्धन बनाउने गृहकार्यमा जुटेको छ । मधेस आन्दोलनमा होमिएका मधेसकेन्द्रित दलहरू मिल्नुपर्ने प्रस्तावसहित लोसपाले सबै दलहरूसँग वार्ता थालेको हो ।
सबैसँग वार्ता गर्न सोमबार लोसपाले प्रमुख सचेतक उमाशंकर अरगरियाको संयोजकत्वमा केशव झा र सुरेन्द्र झा सदस्य रहनेगरी कमिटी गठन गरेको थियो । सोही वार्ता कमिटीले मंगलबार हृदयेश त्रिपाठी नेतृत्वको जनता प्रगतिशील पार्टीसँग छलफल गरेको छ । छलफलबाट दुवै पार्टीबीच गठबन्धन गरेर चुनाव लड्ने सहमति भएको वार्ता संयोजक अरगरियाले बताए । ‘क्रमशः हामी सबै मधेसवादी दलसँग कुरा गर्दै छौँ,’ उनले भने, ‘भोलि रेशम चौधरीको पार्टी नागरिक उन्मुक्ति पार्टीसँग वार्ताको तयारी छ । त्यसपछि सिके राउत नेतृत्वको जनमत पार्टीसँग कुरा गर्दै छौँ । यो चुनावमा अब मधेसकेन्द्रित दलहरू एकढिक्का हुनुको विकल्प छैन । स्थानीय निर्वाचनको परिणामले पनि त्यो देखाइसकेको छ ।’
अरगरियाका अनुसार मधेसकेन्द्रित दलहरू एकढिक्का हुने त्यसपछि अन्य ठूला दलसँग वार्ता गर्ने तयारी छ । सिके राउत नेतृत्वको जनमत पार्टीले त सुरुदेखि नै मधेसकेन्द्रित दल मिलेर चुनाव लड्नुपर्ने प्रस्ताव अघि सरेको थियो । त्यसैले सहकार्य अभियानमा उनीहरू सहमत हुने लोसपा नेताहरूको अपेक्षा छ ।
तर, जसपासँग अलग्गिएर बनेको लोसपाले नेतृत्व गरेको यो प्रस्तावमा उपेन्द्र यादव सहमत होलान् ? लोसपालाई पाँचदलीय गठबन्धनमा प्रवेश रोक्न उपेन्द्र नै बाधक भएको आरोप छ । तर, अरगरिया मधेसकेन्द्रित दलहरूको गठबन्धनमा जसपालाई ल्याउन असम्भव नरहेको बताउँछन् । यसका लागि दुवै पार्टीको एउटै सर्त छ । एक–अर्काको गल्ती औँल्याउँदै आत्मसमीक्षा गरे सहकार्य हुन सक्ने दुवै पक्षको धारणा छ । जसपा अध्यक्ष यादवले त पटकपटक सार्वजनिक कार्यक्रममै लोसपाले विगतको समीक्षा गर्दै गल्ती स्वीकार्न तयार भए एकता र गठबन्धन हुने बताउँदै आइरहेका छन् ।
