राष्ट्रका लागि खेलकुद, स्वास्थ्यका लागि खेलकुद भन्ने नारासहित आउँदो भाद्र दोस्रो सातादेखि पोखरामा प्रथम राष्ट्रिय खुला स्नुकर प्रतियोगिता हुने भएको छ । डेभिज स्नुकर क्लबको आयोजना तथा युवा तथा खेलकुद मन्त्रालय गण्डकी प्रदेश, पोखरा महानगरपालिका खेलकुद विकास समिति, नेपाल विलियार्डस् स्नुकर तथा पुल संघ र कास्की जिल्ला विलियार्ड स्नुकर तथा पुल संघको विशेष सहयोगमा १२ देखि १९ भदौसम्म चल्ने आयोजक क्लबले आइतबार पत्रकार सम्मेलन गरेर जानकारी दिएको हो । उसका अनुसार पोखरा महानगरपालिका–८ स्थित डेभिज स्नुकर क्लबमा प्रतियोगिता सञ्चालन हुनेछ ।
प्रतियोगितामा विजेताले एक लाख ५१ हजार १११ रुपैयाँ नगद पुरस्कार पाउने आयोजकले जनाएको छ । त्यसैगरी, दोस्रोले ७१ हजार १११ रुपैयाँ, सेमिफाइनलिस्ट दुईजनाले जनही १५ हजार १११ तथा हायस्ट ब्रेकरले २१ हजार १११ रुपैयाँ पाउनेछन् । प्रतियोगिता सञ्चालनका लागि १८ लाख २८ हजार खर्च लाग्ने आयोजकको अनुमान रहेको छ ।
राष्ट्रिय खेलकुदमा समावेश नगरिएकोमा गुनासाे
पत्रकार सम्मेलनमा उपस्थित नेपाल विलियार्डस् स्नुकर तथा पुल संघका पदाधिकारी एवं खेलाडीहरूले राष्ट्रिय खेलकुदमा स्नुकरलाई समावेश नगरिएको भन्दै गुनासो गरे । नेपाल विलियार्डस् स्नुकर तथा पुल संघ कास्कीका अध्यक्ष सागरकुमार शाहीले छैटाैँ र साताैँ संस्करणको प्रतियोगितामा यस खेललाई समावेश गरिए पनि आठाैँमा हटाइएको भन्दै आगामी असोजमा हुने नवाैँ संस्करणमा समावेश गर्न आग्रह गरिएपनि नगरिएको भन्दै गुनासो गरे ।
राष्ट्रिय खेलाडी मनीष प्रधान र महेन्द्र नेपालीले देशको प्रतिनिधित्व गर्दै खेलाडीहरूले विदेशबाट पदक ल्याए पनि आफ्नै देशमा आयोजना हुने राष्ट्रिय प्रतियोगितामा समावेश नगरिनु दुःखको कुरा रहेको बताए । नयाँ प्रतिभाशाली खेलाडीहरू उत्पादन गरी देशभर यस खेलको रौनक बढाउने उद्देश्यसहित प्रतियोगिताको आयोजना गरिएको आयोजकले जनाएको छ ।
