नेपाल सरकारले कार, मदिरा, सुर्तीजन्य पदार्थ तथा अन्य विलासी वस्तुमा लगाएको आयात प्रतिबन्ध ४५ दिनका लागि थपेकोमा ‘नेपाल मदिरा पैठारी संघले विरोध गरेको छ । संघले आयातीत मदिराजन्य पदार्थहरूमा यो निर्णय तत्काल फिर्ता नगरिए यसले प्रतिकूल प्रभाव पार्ने भन्दै विरोध गरेको हो ।
बोतलबन्द आयातीत मदिराजन्य पदार्थहरूमा वार्षिक लगभग एक करोड २० लाख अमेरिकी डलर मात्र बिदेसिने संघको भनाइ छ । करिब डेढ अर्ब रुपैयाँ मात्र भनेको वार्षिक बाहिरिने विदेशी मुद्राको शून्य दशमलव १० प्रतिशत मात्र रहेको संघले जनाएको छ । सरकारले बोतलबन्द आयातीत मदिराजन्य पदार्थहरूबाट वार्षिक लगभग तीन अर्ब ३० करोड रुपैयाँ राजस्व प्राप्त गर्ने र यो बिदेसिएको मुद्राको दुई गुणा भएको संघको दाबी छ ।
आयात प्रतिबन्धले बजारमा विदेशी मदिरा उपलब्धताको कमीले बजारमा केही अन्तर्राष्ट्रिय ब्रान्डहरूको नक्कली सामान देखिन थालिसकेको संघको आरोप छ । यसले नेपाली समाजमा व्यापक रूपमा जनस्थास्थ्यमा प्रतिकूल असर पार्न सक्ने संघले विज्ञप्तिमा जनाएको छ । नेपालमा उच्च भन्सार शुल्क र अन्तःशुल्कका कारण यसको अधिकतम मूल्य नेपालमा र भारतीय बजारमा ठूलो अन्तर भइसकेको जनाइएको छ । जसको कारण भारतको उत्तरप्रदेश र पश्चिम बंगाल हुँदै सीमापारिबाट माग बढी हुने विदेशी ब्रान्डहरूको तस्करी हुन थालिसकेको जनाइएको छ ।
विदेशी मदिरा अभावमा होटेल, रेस्टुरेन्ट र बारहरूले ठूलो आय आर्जनको क्षमता गुमाउन थालिसकेकाले उनीहरूको दिगोपना र बेरोजगारी समस्या पनि बढ्ने संघको भनाइ छ । साथै, पर्यटनमा नकारात्मक असर पारेको जनाइएको छ । ठूलो संख्यामा नेपाल आउने भारतीय पर्यटकहरूले अन्तर्राष्ट्रिय ब्रान्डहरू उपभोग गरिरहेकाले विदेशी मुद्रा आर्जन पनि भइरहेको संघले दाबी गरेको छ । नेपाल मदिरा पैठारी संघले नेपालमा अन्तर्राष्ट्रिय बियर, वाइन र स्पिरिट ब्रान्डहरू आयात गर्ने आफ्ना सदस्यहरूलाई प्रतिनिधित्व गर्ने जनाइएको छ ।
