पृथ्वीराजमार्गअन्तर्गत चितवनको इच्छाकामना गाउँपालिका–३ चुम्लिङटारमा दुईवटा सवारीसाधन एक–आपसमा ठोक्किँदा एकजनाको मृत्यु भएको छ । १७ जना घाइते भएका छन् ।
जिल्ला प्रहरी कार्यालय चितवनका अनुसार बिहीबार साँझ साढे ५ बजे काठमाडौंबाट बझाङ जाँदै गरेको ना.६ख १३४० नम्बरको बस र भैरहवाबाट काठमाडौंतर्फ गइरहेको लु.२ख ३५०२ नम्बरको माइक्रो विंगर एक–आपसमा ठाेक्किँदा दुर्घटना भएको हो ।
उक्त दुर्घटनामा परेर घाइते भएका विंगरमा सवार अन्दाजी ३५–३६ वर्षका एक पुरुषको नयाँ मेडिकल कलेज भरतपुरमा उपचारका क्रममा मृत्यु भएको प्रहरीले जनाएको छ ।
दुर्घटनामा परेर दुवै सवारीसाधनका गरी अन्य १७ जना घाइते भएको जिल्ला प्रहरी कार्यालयका प्रवक्ता नरहरि अधिकारीले जानकारी दिए । उनका अनुसार घाइतेमध्ये विंगरचालक रुपन्देहीको बुटवल नगरपालिका– २ का २५ वर्षीय कमल दर्जीको अवस्था गम्भीर रहेको छ ।
घाइतेमध्ये पाँचजनाको नयाँ मेडिकल कलेज भरतपुर र १२ जनाको पुरानो मेडिकल कलेजमा उपचार भइरहेको प्रहरीले जनाएको छ । दुर्घटनाको कारण दुवै सवारीसाधनको अगाडिको भागमा ठूलो क्षति पुगेको छ ।
