वैशाख ३० गते हुन लागेको स्थानीय तह निर्वाचनका लागि लमजुङमा एक सय ८२ मतदान केन्द्र निर्धारण गरिएको छ । मतदाता संख्याको आधारमा एक सय २३ मतदानस्थलमा एक सय ८२ वटा मतदान केन्द्र तोकिएको जिल्ला निर्वाचन कार्यालय लमजुङले जनाएको छ ।
निर्वाचन आयोगले प्रकाशन गरेको अन्तिम नामवलीअनुसार लमजुङमा मतदाताको संख्या एक लाख ३१ हजार चार सय ९४ रहेको छ । जिल्लामा यसअघि एक लाख २२ हजार आठ सय ६ जना मतदाता रहेको जिल्ला निर्वाचन कार्यालय लमजुङले जनाएको छ ।
मतदानस्थलको अनुगमन र निरीक्षण तीव्र
स्थानीय तहको चुनाव नजिकिँदै गर्दा सुरक्षा निकायले मतदानस्थलको अनुगमन र निरीक्षण तीव्र पारेका छन् । लमजुङमा प्रहरी प्रशासनले राजनीतिक कार्यक्रमको पनि सुरक्षा सतर्कता बढाएको छ । प्रमुख जिल्ला अधिकारी सुशील वैद्यले मतदानस्थलको सुरक्षा अवस्था, यातायात, मतदाताको पहुँचबारे जानकारी लिइएको बताए ।
मतदानस्थल र केन्द्रको निरीक्षण तथा अवलोकनमा नेपाल प्रहरीका डिएसपी कृष्णबहादुर कार्की, सशस्त्रका डिएसपी नवराज थापालगायत कर्मचारी र प्रहरीले सँगसँगै मतदानस्थल र केन्द्रको अवलोकन गरेका छन् । सुरक्षा निकायले लमजुङका १० वटा बढी मतदानस्थललाई अति संवेदनशीलमा राखेको छ । चार नगरपालिका र चार गाउँपालिका रहेको लमजुङमा ७५ वटा वडा छन् । यसमा एक सय २३ वटा मतदानस्थल छन् । एक सय ८२ वटा मतदान केन्द्र तोकिएको निर्वाचन कार्यालय लमजुङले जनाएको छ ।
