ललितपुरको कोन्ज्योसोम गाउँपालिकास्थित नल्लुमा कोठा न्यानो बनाउन कोइला बालेर सुत्दा एकै परिवारका पाँचजनाको मृत्यु भएको छ । मृत्यु हुनेमा ५५ वर्षीया काइँली स्याङ्तान, २२ वर्षीया बुहारी सुष्मा स्याङ्तान, नौ वर्षीय नाति आशिष स्याङ्तान र पाँच वर्षीया नातिनी आस्मा स्याङ्तान छन् । उनीहरू सोमबार बिहान ८:२० बजे मृत अवस्थामा भेटिएका थिए । दुई दिने शिशुको उपचारको क्रममा पाटन अस्पतालमा मृत्यु भएको छ ।
डिएसपी द्वारिका घिमिरे, महानगरीय प्रहरी वृत्त चापागाउँ
राति सुत्ने वेलामा कोइला बालेर सुतेका रहेछन्, नवजात शिशुलाई न्यानो पार्न कोइला बालेको देखिन्छ, साँघुरो कोठाका झ्यालढोका पनि बन्द रहेछन् ।
बिहान अबेरसम्म परिवारका सदस्य बाहिर ननिस्किएपछि छिमेकीले बोलाएका थिए । ढोका नखोलेपछि कोन्ज्योसोम गाउँपालिका–४ का वडाध्यक्ष तीर्थ घलानसहितको टोलीले उनीहरू सुतेको कोठाको ढोका खोलेको थियो । त्यतिवेला चारजना मृत अवस्थामा भेटिएका थिए भने दुईदिने शिशु र अर्का एकजना अचेत अवस्थामा थिए । शिशुको पाटन अस्पतालमा उपचारको क्रममा मृत्यु भएको थियो ।
महानगरीय प्रहरी वृत्त चापागाउँका डिएसपी द्वारिका घिमिरेका अनुसार कोइला बालेर परिवारका सदस्य एकै कोठामा सुतेका थिए । अक्सिजनको कमी भएपछि उनीहरूको मृत्यु भएको थियो । ‘राति सुत्ने वेलामा कोइला बालेर सुतेका रहेछन्, नवजात शिशुलाई न्यानो पार्न कोइला बालेको देखिन्छ, साँघुरो कोठाका झ्यालढोका पनि बन्द रहेछन्,’ उनले भने ।
प्रहरीका अनुसार आइतबार राति नल्लुस्थित स्याङ्तान परिवार खाना खाएर एउटै कोठामा सुतेको थियो । नवजात शिशुलाई न्यानो पार्न उनीहरूले कोइला बालेका थिए । सुत्ने वेला झ्यालढोका बन्द गरिएको थियो । प्रहरीका अनुसार कोठामा कोइला बालेर सुतेका एकै परिवारका चार सदस्य सोमबार बिहान मृत अवस्थामा भेटिएका हुन् । एकजना घाइते भएको महानगरीय प्रहरी परिसर ललितपुरले जनाएको छ ।
सात वर्षमा निसास्सिएर ३७ को मृत्यु, पछिल्लो एक महिनामा मात्रै उपत्यकामा १० ले ज्यान गुमाए
प्रहरीका अनुसार पछिल्ला सात वर्षमा निसास्सिएर ३७ जनाको मृत्यु भएको छ । ग्यास गिजरमा नुहाउँदा तथा कोठामा कोइला, हिटर बालेर सुत्दा निसास्सिएर उनीहरूको मृत्यु भएको हो । ग्रामीण क्षेत्रमा सुत्ने वेलामा कोठामा आगो तथा कोइला बाल्ने गरिन्छ । कोठा न्यानो पार्न पूरै झ्याल र ढोका बन्द गर्दा अकालमै ज्यान जाने गरेको छ ।
राति कोठामा अक्सिजन कमी हुन गई अकालमै ज्यान गुमाउनेको संख्या बढेको महानगरीय प्रहरी परिसरका प्रवक्ता दिनेशराज मैनालीले बताए । उनका अनुसार एक महिनाको अवधिमा उपत्यकामा १० जनाको निसास्सिएर मृत्यु भएको छ । निसास्सिएर मृत्यु हुनेको संख्या बढेपछि प्रहरीले सचेतना अपनाउन आग्रह गरेको छ । महानगरीय प्रहरी परिसर काठमाडौं र ललितपुरले जाडोमा हिटर, गिजर, कोइला, आगोको प्रयोग गर्दा अपनाउनुपर्ने सावधानीबारे सचेतनामूलक कार्यक्रम गर्ने बताएको छ । ‘कोठा बन्द गरेर आगो, ग्यास गिजर, हिटर र कोइला प्रयोग गर्नु राम्रो हुँदैन, यसबारेमा केहीलाई थाहा पनि छैन, त्यसैले हामीले जनचेतनामूलक कार्यक्रम गर्न जरुरी छ,’ परिसर ललितपुरका एसएसपी यज्ञविनोद पोखरेलले भने ।
सात वर्षयता निसासिएर मृत्यु र घाइते हुनेको संख्या
- ०७२– तीनको मृत्यु, दुई घाइते
- ०७३– दुईको मृत्यु, दुई घाइते
- ०७४– दुईको मृत्यु, एक घाइते
- ०७५– दुईको मृत्यु
- ०७६– १२ को मृत्यु, ६ जना घाइते
- ०७७– एकजना घाइते
- ०७८ मा १६ को मृत्यु, पाँचजना घाइते
