अन्तर्राष्ट्रिय रेडक्रस सोसाइटीको डाइरेक्टर हुँ भन्दै ठगीमा संलग्न एक भारतीय नागरिकलाई प्रहरीले पक्राउ गरेको छ । भारत चेन्नाई तामिलनाडुका ४४ वर्षीय शिवम विरुमुथु चेटियार पक्राउ परेका हुन् ।
महानगरीय अपराध महाशाखाबाट खटिएको प्रहरी टोलीले उनलाई मंगलबार बालुवाटारबाट पक्राउ गरेको हो । उनले पोखरास्थित मणिपाल अस्पतालको सेयर मिलाई दिने भन्दै एक व्यक्तिसँग पचास लाख रुपैयाँ ठगी गरेका थिए । बिक्रीका निम्ति भारतीय सेयर होल्डरहरूसँग कुराकानी भएको र उनीहरू सम्झौता गर्न तयार भएको भन्दै उनले एग्रिमेन्टको नक्कली ड्राफ्ट नै बनाएका थिए । सोही ड्राफ्ट देखाउँदै उनले धेरै पीडितबाट करोड रुपैयाँभन्दा धेरै ठगी गरेको महाशाखाका प्रवक्ता एसपी कृष्ण कोइरालाले बताए ।
उनले भने, ‘यसले आफूलाई अन्तर्राष्ट्रिय रेडक्रस सोसाइटीको डाइरेक्टर हुँ भन्दो रहेछ । सोही आवरणमा माथिल्लो ओहदाका मान्छेसँग सम्बन्ध बनाउने रहेछ । मणिपाल अस्पतालको सेयर मिलाइदिने भन्दै रकम असुल्ने रहेछ । यसैगरी यसले धेरैजनाबाट करोडौ रुपैयाँ ठगी गरेकोे सूचना आएको छ । अनुसन्धान जारी छ ।’
प्रहरीका अनुसार शिवमले अन्तर्राष्ट्रिय रेडक्रस सोसाइटीको नक्कली कार्ड बनाएका छन् । विभिन्न कम्पनीको नक्कली सेयर होल्डर प्रमाणपत्र बनाएका छन् । विभिन्न नाममा कम्पनी दर्ता गर्ने, सोही नाममा बैंकमा खाता खोल्ने र खातामा करोडौँ रुपैयाँ रहेको भन्दै नक्कली बैक स्टेटमेन्ट बनाउने उनको खास धन्दा रहेको प्रहरीको अनुसन्धानबाट खुलेको छ ।
सोही कागजातका आधारमा उनले विभिन्न व्यक्तिको जग्गाधनी पुर्जासमेत नियन्त्रणमा लिने गरेको महाशाखाका एसपी कोइरालाले बताए । उनले भने, ‘यसले अन्तर्राष्ट्रिय रेडक्रस सोसाइटीको नक्कली परिचयपत्र बनाएको छ । सोही तवरले सेयरधनीको कागजात र बैंक स्टेटमेन्टसमेत नक्कली बनाएको छ । त्यसैको आधारमा यसले सर्वसाधरण ठग्दै आएको देखिन्छ । पीडित आउने क्रम जारी छ । ठगी गरेको रकम बढ्न सक्छ ।’
प्रहरीका अनुसार उनले विभिन्न व्यक्तिबाट नागरिकताको फोटोकपी लिने, सोही नामबाट बैंकमा खाता खोल्ने र ठगी गरेको रकम सोही खातामा जम्मा गर्ने गरेका थिए । उनले यसअघि विभिन्न व्यक्तिलाई विदेश पठाइदिने भन्दै ठगी गर्ने गर्थे । यस अभियोगमा उनी २२ जेठ ०७२ मा पक्राउ परेका थिए । वैदेशिक रोजगारीसम्बन्धी कसुरमा उनलाई अदालतले दुई वर्ष कैद र तीन लाख ५० हजार रुपैयाँ जरिवाना हुने ठहर गरेको थियो । आदेशअनुसार उनले कैद सजाय डिल्ली बजार कारागारमा भुक्तान गरेका थिए ।
कारागारबाट छुटेपछि पनि उनले ठगी धन्दालाई जारी राखेका थिए । ठगी गरेको रकम फिर्ता दिने आस्वासन जारी नै राखेको हुँदा पीडित अझै पनि जाहेरी बोकेर प्रहरी कार्यलय नआएको महाशाखाका एसपी कोइरालाले बताए ।
