नेपाली कांग्रेस काठमाडौंका नेता दामोदर खड्काले पार्टीको काठमाडौं जिल्ला सभापतिमा उम्मेदवारी दिने भएका छन्। नयाँ पत्रिकासँगको कुराकानीमा उनले जिल्ला सभापतिमा उम्मेदवार बन्न लागेको सार्वजनिक गरेका हुन् । उनले आफू सभापति शेरबहादुर देउवा र कृष्ण सिटौलाको प्यानलबाट उम्मेदवार बन्न लागेको जानकारी दिए । कांग्रेस कार्यतालिकाअनुसार काठमाडौंमा मंसिर १० का लागि जिल्ला अधिवेशनको मिति तय गरिएको छ। यही विषयमा उनीसँग गरिएको कुराकानी :
तपाईंको उम्मेदवारीका आधार के–के छन् ?
म यसअघि कांग्रेसको विभिन्न जिम्मेवारीमा रहेर कार्यसम्पादन गरिसकेको छु । काठमाडौंको सचिवको जिम्मेवारीमा रहेर पनि काम गरिसकेको छु। यिनै अनुभवका आधारमा म सभापतिको तयारीमा जुटेको छु।मलाई पार्टी सभापति शेरबहादुर देउवा र नेता कृष्ण सिटौलाको साथ छ। यसअघि राजु श्रेष्ठले सभापति बन्ने घोषणा गर्नुभएको छ। उहाँले पनि मलाई साथ दिनुहुनेछ भन्ने विश्वास छ।
समूह कस्तो बन्छ र कहिले घोषणा गर्नुहुन्छ ?
केही दिनमै उम्मेदवार घोषणा हुन्छ । कांग्रेसको विधानले नै समावेशिताको परिकल्पना गरेको छ । विधानअनुसार योग्य र सक्षमलाई समेटेर टिम बनाँउछौँ । केही आकांक्षीहरू पनि अगाडि आइसक्नुभएको छ।छिट्टै घोषणा हुन्छ।
तपाईंका योजना र प्रतिबद्धता के–कस्ता हुनेछन् ?
हामी लिखित रूपमा हाम्रा योजनाहरू केही समयमा सार्वजनिक गर्छौँ । अहिलेको कार्यसमितिले गरेका राम्रा कामलाई निरन्तरता दिएर नयाँ योजनामा काम गर्ने योजना रहनेछन्। विशेषगरी वैचारिक अस्पष्टता हटाउन तल्लो तहसम्म प्रशिक्षण दिने, प्रविधिमैत्री कांग्रेस बनाउने र कांग्रेसभित्रको फुटलाई अन्त्य गर्ने मेरो योजना र प्रतिबद्धता रहनेछ। काठमाडौं कांग्रेसलाई नमुना बनाउने मेरो लक्ष्य रहनेछ ।
विधानले जिल्ला सभापतिका लागि केन्द्रीय महाधिवेशन प्रतिनिधि बन्नुपर्ने व्यवस्था गरेको छ नि ?
मंसिर ६ मा केन्द्रीय महाधिवेशन प्रतिनिधि छनाेटको कार्यतालिका तय भएको छ। यसका लागि पनि सहयोगका लागि म आग्रह गर्छु।
