प्रमुख सत्तारूढ दल कांग्रेसका नेता तथा पूर्वमन्त्री रमेश लेखकले अबको चार दिनभित्र सरकारले पूर्णता पाउने बताएका छन् । कांग्रेस सभापति शेरबहादुर देउवा प्रधानमन्त्री बनेको एक महिना हुँदासमेत मन्त्रिपरिषद् विस्तार हुन सकेको छैन । हाल कांग्रेसबाट प्रधानमन्त्री, दुई मन्त्री र एक राज्यमन्त्री तथा माओवादी केन्द्रबाट दुई मन्त्री छन् ।
मन्त्रिपरिषद् विस्तार नहुँदा सत्तारुढ दल जसपा सरकारमा जान पाएको छैन । गठबन्धनका एमालेको माधवकुमार नेपाल पक्ष र राष्ट्रिय जनमोर्चाले सरकारमा नजाने बताएका छन् । तर, सत्तारुढ दलका नेताहरूले एमालेको नेपाल पक्ष पनि सरकारमा सहभागी हुने बताउँदै आएको छ । सोही कारण मन्त्रिपरिषद् विस्तारमा ढिलाइ भएको सत्तारुढ दलका नेताहरूले दाबी गर्दै आएका छन् ।
आइतबार राजधानीमा आयोजित एक कार्यक्रममा देउवानिकट नेता लेखकले सरकारमा नेपाल समूह आउँछ कि आउँदैन भन्ने यकिन नभएको बताए । सरकारलाई सही तवरले सञ्चालन गराउन गठबन्धनको तर्फबाट साझा न्यूनतम कार्यक्रम ल्याइसकेकाले सोहीअनुसार अगाडि बढ्ने उनले बताए ।
उनले भने, ‘साझा न्यूनतम कार्यक्रम आएपछि सरकार विस्तार गर्ने कुरा थियो, अहिलेसम्म विस्तार हुन सकेन, यसमा ढिलाइ भयो, यो कुरा म स्वीकार गर्छु । तर, अब ढिलाइ गर्नुहुँदैन । चाँडोभन्दा चाँडो मन्त्रिपरिषद् विस्तार गर्नुपर्छ ।’
लेखकले कांग्रेस, माओवादी केन्द्र, एमाले नेपाल समूह, जसपा र जनमोर्चाको अहिलेको गठबन्धन लामो समयसम्म जाने पनि विश्वास दिलाए ।
