अर्जेन्टिनी कप्तान लियोनल मेसीले अब पेरिस सेन्ट जर्मेन (पिएसजी) बाट प्रतिसाता दश लाख पाउन्ड पारिश्रमिक बुझ्ने भएका छन् । यद्यपि, मेसी र पिएसजीबीचको सम्झौतापत्रमा हस्ताक्षर भएको छैन । यस्तै मेसी पिएसजीमा दुई वर्ष रहने सम्झौतापत्रमा उल्लेख छ ।
आइतबार मात्रै मेसीले दुई दशकपछि बार्सिलोना छाड्ने घोषणा गरेका थिए । आफ्नो माग पूरा नगर्दा अर्जेन्टिनी खेलाडी मेसीले बार्सिलोना छाडेका हुन् । बार्सिलोनामा रहनका लागि मेसीले तबल आधा बनाउने प्रस्तावसमेत राखेका थिए । तर, बार्सिलोनाले त्यो माग पूरा गर्न सकेन । गत आइतबार पत्रकार सम्मेलन आयोजना गर्दै मेसीले बार्सिलोना परित्याग गरेको र करिअरमा नयाँ अध्याय सुरु गर्न लागेको घोषणा गरेका थिए ।
६ पटकका बालोन डिअर विजेता मेसीलाई इंग्लिस क्लबले पनि तान्ने कोसिस गरेका थिए । तर, कतारी धनाढ्यको लगानीमा रहेको पिएसजीले मेसीसँग सम्झौता गर्न सफल भयो । पिएसजीसँग आधिकारिक रूपमा सम्झौता गर्न मंगलबारै मेसी बार्सिलोनाबाट पेरिस पुगेका छन् । निकै कडा सुरक्षा व्यवस्थाबीच मेसी पिएसजीमा पुग्दा सयौँ समर्थकले स्वागत गरेका छन् । मेसीले बाल्कोनीबाट पेरिस लेखिएको टिसर्ट लगाउँदै समर्थकलाई धन्यवाद दिएका थिए ।
मेसी र पिएसजीबीच बुधबार आधिकारिक रूपमा सम्झौता हुनेछ । पिएसजीको अफिसियल ट्विटरमार्फत भने मेसीलाई पेरिसमा ल्याउन सफल भएको सोमबार राति नै जानकारी दिइएको थियो । ‘मेसीले राखेका प्रस्ताव हामीले स्वीकार गरेका छौँ, अब आइफेल टावरअगाडि मेसी सार्वजनिक हुनेछन्, पिएसजीमा नेमार र केलियन एम्बाप्पेसँगै मेसीको आक्रामक शक्ति देख्न पाइनेछ,’ पिएसजीले जनाएको छ ।
बिबिसीले पनि मेसी पिएसजीका खेलाडीका रूपमा पेरिस पुगेको जनाएको छ । ‘यो सत्य हो, लियोनल मेसी अब पेरिसका खेलाडी बनिसकेका छन्,’ बिबिसीका पत्रकार वालागुईलाई उद्धृत गर्दै लेखेको छ, ‘मेसी पेरिसमा आउने भएपछि रंगशालामा सुरक्षा गस्ती बढाइएको छ ।’ गत आइतबार नै मेसीका वकिलले पिएसजीसँगको सम्झौता सम्बन्धमा सबै डकुमेन्ट तयार पारेका थिए । मेसी र पिएसजीबीचको सम्झौताको मुख्य आकर्षक पक्ष नै पारिश्रमिक र वार्षिक रूपमा पाउने बोनस हो । सामान्य रूपमा मेसीले पिएसजीबाट ६३ मिलियन पाउन्ड पाउनेछन् ।
फ्रान्सको नियमअनुसार विदेशी खेलाडीले ४५ प्रतिशत ट्याक्स बुझाउनुपर्छ । प्रतिसाता दश लाख पाउन्ड थाप्ने मेसीले नियमअनुसार ४५ प्रतिशत नै कर बुझाउन पर्छ । सबै करपछि मेसीले प्रतिसाता पाँच लाख ५० हजार पाउन्ड पाउनेछन् । दुई पक्षबीच सम्झौतापछि पिएसजीमा आबद्ध विदेशी खेलाडीमध्ये मेसी धेरै कर बुझाउनेमा परेका छन् । मेसीका बुबा एवं एजेन्ट जर्ज पनि मंगलबार पिएसजी पुगेका छन् । उनले आफ्ना छोरा मेसी र पिएसजीसँगको सबै सम्झौता पूरा भइसकेको जानकारी दिए ।
नाउ क्याम्पबाट मेसीको पोस्टर हट्यो
पिएसजीसँग अनुबन्ध भएसँगै बार्सिलोनाले आफ्नो घरेलु रंगशाला नाउ क्याम्पमा रहेको मेसीको पोस्टर हटाएको छ । रंगशाला प्रवेश गर्ने गेटअगाडि नै मेसीसँगै बार्सिलोनाका स्टार खेलाडीका पोस्टर राखिएको थियो । बार्सिलोनाले मंगलबार नै मेसीको तस्बिर हटाउन निर्देशन दिएको हो । सन् २००४ मा बार्सिलोनाको सिनियर टोलीबाट डेब्यु गरेका मेसीले नाउ क्याम्पमा ३४ उपाधि जितेका छन् । १७ सिजन बार्सिलोनामा रहँदा उनले दशपटक स्पेनिस ला लिगा र कोपा डेल रे सातपटक उचालेका छन् । यसैगरी उनले युईएफए सुपर कप तथा क्लब विश्वकप समान तीनपटक हात पारेका छन् ।
नेमार र मेसी फेरि सँगै
विश्व फुटबलमा नेमार र मेसी असाध्यै मिल्ने साथीमा पर्छन् । सन् २०१७ मा नेमार कीर्तिमानी रकममा बार्सिलोनाबाट पिएसजीमा अनुबन्ध हुँदा मेसीले क्लबको आलोचना गरेका थिए । क्लबको व्यवस्थापनकै कमजोरीका कारण बार्सिलोनाले एक स्टार खेलाडी गुमाएको प्रतिक्रिया मेसीले दिएका थिए । नेमारलाई बार्सिलोनामा फर्काउन मेसीले धेरै प्रयास गरे । तर, उनी सफल भएनन् ।
अर्कोतिर नेमारले कुनै दिन मेसीसँगै फुटबल खेल्ने सपना रहेको वेलावेला बताइरहन्थे । चार वर्षपछि मेसी र नेमार एकै क्लबबाट खेल्न अवसर जुरेको छ । मेसी पिएसजीसँग सम्झौतानजिक पुगेको थाहा पाउँदा नेमारले सामाजिक सञ्जालमा ‘फेरि सँगै भयौँ’ लेखेका छन् ।
पिएसजीमा अहिले नेमार सबैभन्दा महँगा खेलाडीमा पर्छन् । मेसी पिएसजीमा आउँदा दश नम्बरको जर्सीसमेत दिने नेमारले घोषणा गरिसकेका छन् । पिएसजीमा नेमार दश नम्बरको जर्सीबाट खेल्छन् । सम्झौताअनुसार नेमारले भन्दा मेसीले प्रतिसाता बढी पारिश्रमिक पाउनेछन् ।
