भारतीय सीमा सुरक्षा बल (एसएसबी)ले तुइन फुकालेर महाकालीमा बेपत्ता भएका व्याँस गाउँपालिका– २ मालगाउँका जयसिंह धामीको ड्रोन क्यामेराबाट महाकाली नदीमा खोजी गरिने भएको छ । सीमानदीमाथि ड्रोन उडाउन जिल्ला प्रशासन कार्यालय दार्चुलाले भारतको पिथौरागढ जिल्लाका डिएम कार्यालयलाई पत्राचार गरेको छ । गत १५ साउनमा जिल्ला सदरमुकाम खलंगा आउन तुइन तर्दै गर्दा एसएसबीले डोरी फुकालिदिएपछि जयसिंह महाकालीमा बेपत्ता भएका थिए ।
घटनाको अनुसन्धान गर्न सरकारले गृह मन्त्रालयका सहसचिव जनार्दन गौतमको नेतृत्वमा टोली बनाएको थियो । १९ साउनदेखि सरकारी टोली दार्चुलामै छ ।सरकारले जयसिंहको खोजी गर्न टोलीलाई निर्देशन दिएपछि ड्रोन क्यामेराको प्रयोग गरिन लागेको हो । काठमाडौंबाट ड्रोन क्यामेरासहितको टोली आइतबार साँझ दार्चुला आइपुगेको अनुसन्धान समितिका संयोजक गौतमले बताए । ‘बेपत्ता जयसिंहको अवस्थाबारे हामी अझै खोजी गर्छौँ,’ उनले भने, ‘डेथ बडी भए पनि महाकाली क्षेत्रमा ड्रोन क्यामेराको सहारामा हेर्ने भन्ने भएको छ ।’
गौतमका अनुसार तुइन लगाइएको व्याँस गाउँपालिका– २ मालघाटदेखि सदरमुकाम खलंगासम्मको नदी र किनार क्षेत्रमा ड्रोन क्यामेराबाट खोजी गरिनेछ । यहाँसम्मको दूरी करिब २५ किलोमिटर छ । महाकाली नदी नेपाल–भारत सीमानदी हो । सीमा क्षेत्रमा ड्रोन क्यामेरा उडाउन दुवै देशको सहमति आवश्यक हुन्छ । त्यसैले सीमावर्ती भारतीय डिएम कार्यालयलाई समन्वयका लागि पत्राचार गरिएको दार्चुलाका सहायक सिडिओ ज्योत्सना भट्ट जोशीले बताइन् । ‘हामीले शनिबार भारतीय डिएम कार्यालयलाई बेपत्ता धामीको खोजी गर्न ड्रोन क्यामेरा प्रयोगको अनुमतिका लागि पत्राचार गरेका छौँ, पत्रको जवाफ आइसकेको छैन,’ उनले भनिन् । नेपाल प्रहरी र सशस्त्र प्रहरीको उद्धार टोलीले अहिले पनि बेपत्ता जयसिंहको नदी किनारमा खोजी गरिरहेको छ ।
अनुसन्धान टोलीले अहिले पनि बयान लिने, सोधपुछ गर्ने काम गरिरहेको छ । शुक्रबार पीडितको परिवारसँग र नेपालतर्फको घटनास्थल निरीक्षण गरी फर्किएको टोलीले सँगसँगै प्रतिवेदनको काम पनि गरिरहेको संयोजक गौतमले बताए । ‘अनुसन्धान पनि जारी छ । अहिले सुरक्षा समितिका सदस्य, घटनास्थलनजिकका सुरक्षाकर्मीलगायतसँग सोधपुछ चलिरहेको छ,’ उनले भने ।
१७ साउनमा गठन भएको अनुसन्धान टोलीलाई १० दिनभित्र प्रतिवेदन तयार गर्ने समयावधि तोकिएको थियो । ‘तर, तोकिएको समयभित्र प्रतिवेदन तयार नहुन पनि सक्छ । ड्रोन क्यामेराले खोजी गरेपछि हामी फर्किन्छौँ । काठमाडौं पुगेपछि अन्तिम प्रतिवेदन तयार हुन्छ,’ संयोजक गौतमले भने । टोलीमा नेपाल प्रहरीका एआइजी पुरुषोत्तम कँडेल, राष्ट्रिय अनुसन्धान विभागका निर्देशक हुतराज थापा, सशस्त्र प्रहरीका एसएसपी सुरेशकुमार श्रेष्ठ र दार्चुलाकी सहायक सिडिओ ज्योत्सना भट्ट सदस्य छन् ।
पीडित परिवारलाई २० हजार आर्थिक सहयोग हस्तान्तरण
राष्ट्रिय प्रजातन्त्र पार्टीका नेता डा. प्रकाशचन्द्र लोहनीले बेपत्ता जयसिंह धामीको परिवारलाई २० हजार आर्थिक सहयोग गरेका छन् । नयाँ पत्रिकामा पीडित परिवारको अवस्थाबारे समाचार पढेपछि उनले सहयोग गरेका हुन् । डा. लोहनीले नयाँ पत्रिकाका दार्चुला सहकर्मी नरेन्द्रसिंह कार्कीमार्फत पीडित परिवारलाई सहयोग पठाएका हुन् । कार्कीले सहयोग रकम आइतबार बेपत्ता जयसिंहका भाइ नरेन्द्रसिंह धामीलाई हस्तान्तरण गरेका छन् । जयसिंहको परिवारमा एक छोरा, एक छोरी र श्रीमती छन् ।
