सभामुख अग्निप्रसाद सापकोटाले सिंहदरबारस्थित सबै कार्यालयहरूको सरकारी खाता राष्ट्रिय वाणिज्य बैंकमा सञ्चालन गर्ने सन्दर्भमा बैंकका सिइओलगायतसँग छलफल गरेका छन् । आइतबार सभामुखले लामो समयदेखिको प्रयासस्वरूप सरकारी स्वामित्वको बैंकमार्फत खाताहरू व्यवस्थित गर्न छलफल बोलाएका हुन् ।
उक्त छलफलमा बैंकका सिइओ किरणकुमार श्रेष्ठले देशभर सातवटै प्रदेश ७७ जिल्लामा दुई सय ७४ शाखा सञ्चालन भइरहेको, दुई सय ५० अर्बभन्दा बढी डिपोजिट रहेको र एक सय ८० अर्बभन्दा बढी क्रेडिट रहेको अग्रणी बैंक भएको बैंकिङ सेवाका सबै सेवाहरू बैंकले प्रदान गरिरहेको बताए । उनले सरकारको निर्णयलाई अवसरको रूपमा लिई बैंकले कार्ययोजना बनाई आवश्यक जनशक्ति र प्रविधिको व्यवस्थापन गरी अन्य बैंकभन्दा राम्रो सेवा दिनेसमेत प्रतिबद्धता जनाए ।
