फोन पे पेमेन्ट सर्भिस लिमिटेडले आफ्नो क्युआरमार्फत भुक्तानी लिने मर्चेन्टहरूलाई लक्षित गर्दै ‘आम्मामामा क्युआरमा उपहार, दिनदिनै एक लाख’ उपहार नामक योजना सार्वजनिक गरेको छ । कम्पनीले देशभरका व्यवसायीलाई डिजिटल भुक्तानीका लागि प्रोत्साहन गर्ने उद्देश्यले यो योजना ल्याइएको हो ।
योजनाले फोन पेको नेटवर्कमा आबद्ध भइसकेका र आबद्ध हुन चाहने सबै व्यवसायलाई समेट्ने जनाइएको छ । योजनामा हरेक दिन क्युआरआर्फत भुक्तानी लिने व्यवसायीमध्ये १ जनाले १ लाख रुपैयाँ जित्ने जनाइएको छ । योजनामा फोन पेमार्फत भुक्तानी लिने देशभरका मर्चेन्टहरूको सहभागिता हुने कम्पनीले जनाएको छ ।
यस योजनामा सहभागी हुनका लागि फो नपे बिजनेसमा रजिस्ट्रर भएको हुनुपर्ने जनाइएको छ । त्यस्तै, उपहार योजनामा सहभागी हुनका लागि फोन पेमार्फत दैनिक भुक्तानी लिएको हुनुपर्ने सर्त राखिएको छ ।
योजनामा हरेक दिन बिहान १२ बजेदेखि राति ११:५९ सम्म कारोबार गर्ने सबै व्यवसायी सहभागी हुने जनाइएको छ । विजेता लक्की ड्रमार्फत छनोट गरिने र विजेताको घोषणा हरेक दिन साँझ ५ बजे फोन पे बिजिनेसको फेसबुक लाइभमार्फत गरिने कम्पनीले जनाएको छ । यस योजनामा फोन पेमार्फत धेरैभन्दा धेरै कारोबार गर्ने व्यवसायीहरूले जित्ने सम्भावना बढी रहने जनाइएको छ । योजना साउन १३ देखि ३ महिनासम्म सञ्चालन हुने कम्पनीले जनाएको छ ।
फोन पे नेटवर्कमा ६० वटा बैंक तथा वित्तीय संस्था आबद्ध रहेको तथा ४ लाख ५० हजारभन्दा बढी मर्चेन्ट रहेको जनाइएको छ । १ करोड ३० लाखभन्दा धेरै मोबाइल बैंकिङ प्रयोगकर्ता तथा ४५ लाखभन्दा बढी भुक्तानी सेवाप्रदायकका मोबाइल एप्समार्फत यसले सेवा प्रदान गर्दै आएको कम्पनीले जनाएको छ ।
