एमाले विवाद समाधानका लागि गठित कार्यदलका नेताहरूले पार्टीको आन्तरिक एकता सुदृढीकरणको छलफल अन्तिम बिन्दुमा पुगेकाले आइतबार एकतासम्बन्धी सहमति सार्वजनिक हुने दाबी गरेका छन् । शनिबार सिंहदरबारमा बसेको बैठकपछि कार्यदलका नेताहरूले सहमतिलाई अन्तिम रूप दिने दाबी गरेका थिए ।
कार्यदलले टुंग्याएको मस्यौदामा केन्द्रित रहेर प्रधानमन्त्री केपी ओलीले निकट नेताहरूसँग तथा वरिष्ठ नेता माधव नेपाल समूहले स्थायी समिति सदस्यहरूसँग राति अबेरसम्म छलफल गरेका छन् । दुवैतर्फका स्थायी कमिटी सदस्यहरूको समेत सुझाबलाई ध्यानमा राखेर मस्यौदालाई अन्तिम रूप दिने कार्यदलको तयारी छ ।
आइतबार बिहान बस्ने कार्यदलको बैठकले सहमतिको प्याकेजलाई अन्तिम रूप दिने र त्यसपछि बस्ने स्थायी कमिटी बैठकबाट अनुमोदन हुने उनीहरूको भनाइ छ । ‘हामीले विभिन्न विषयवस्तुमा छलफल गरेका छौँ र छलफलको अन्तिम–अन्तिम बिन्दुतिर पुगेका छौँ । सम्भवतः छलफललाई छिटै पूरा गरेर एउटा निष्कर्षमा पुग्नेछौँ,’ कार्यदलमा वरिष्ठ नेता माधवकुमार नेपालतर्फका संयोजक भीमबहादुर रावलले भने ।
त्यस्तै, स्थायी कमिटी सदस्य सुवास नेम्वाङले भने, ‘हामीले साह्रै मिहिनेतका साथ तपाईंहरूको समेत शुभकामनामा काम टुंग्याएबराबर छ । भोलि बिहान ८ बजे तपाईंहरूले सुखद समाचार सुन्न पाउनुहुनेछ । ढुक्कैसँग बधाई र धन्यवाद दिए हुन्छ । तीन वर्षको कत्रो विवादमार्फत हामी यहाँ आयौँ । तीन वर्षको विवाद आज कति दिन भयो र बसेको ? त्यसैले ढिलो भएको छैन ।’
