५५ वर्षपछि जर्मनीलाई नकआउट चरणमा परास्त गरेको इंग्ल्यान्ड यतिवेला निकै आत्मविश्वासका साथ देखिएको छ । इंग्ल्यान्डले चालू युरोकप २०२० को प्रिक्वार्टरफाइनलमा जर्मनीलाई २–० ले स्तब्ध पारेको हो । सन् १९६६ को विश्वकप फाइनलपछि इंग्ल्यान्डले जर्मनीलाई कुनै पनि मेजर अन्तर्राष्ट्रिय फुटबल प्रतियोगितामा नकआउट चरणमा हराएको यो नै पहिलोपटक हो । फुटबल इतिहासमा इंग्ल्यान्डको उपस्थिति बलियो छ ।
अन्तर्राष्ट्रिय फुटबल प्रतियोगिताको थुप्रै अनुभव बटुलेको इंग्ल्यान्डले युक्रेनले सम्भवतः हल्का लिँदा भुल हुनेछ । युक्रेनले सन् १९९२ को अप्रिलमा पहिलो अन्तर्राष्ट्रिय खेल खेलेको हो । अन्तर्राष्ट्रिय फुटबल खेलमा त्यति धेरै लामो इतिहास नभए पनि युक्रेनले युरोकप तथा विश्वकपमा आफ्नो प्रदर्शन सधैँ दमदार बनाएको छ । यसकारण, पनि युक्रेनले सेमिफाइनल प्रवेशका लागि इंग्ल्यान्डलाई कडा चुनौती दिने सम्भावना छ ।
जर्मनीमाथिको सनसनी जितसँगै इंग्ल्यान्ड पुनः एकपटक मेजर फुटबल प्रतियोगिताको उपाधितर्फ लम्केको छ । तर, इंग्ल्यान्डले उपाधिसम्मको यात्रा सम्भव पार्न शनिबार मध्यराति इटालीको राजधानी रोमको स्टुडियो रंगशालामा युक्रेनको चुनौती पाखा लगाउनुपर्ने हुन्छ । चालू युरोकपमा युक्रेन डार्क हर्सकै रूपमा अगाडि बढिरहेको छ ।
युक्रेनले क्वार्टरफाइनलसम्मको यात्रामा उपाधि दाबेदार टोलीमाथि जित निकाली सनसनी मच्चाइरहेको छ । इटालीको रोम रंगशालामा युक्रेन र इंग्ल्यान्डबीचको खेल प्रतिस्पर्धात्मक बन्ने पक्का छ । युक्रेनका प्रशिक्षक एन्ड्रेय सेभ्चेन्कोको प्रशिक्षणमा रहेको युक्रेनले समूह चरणमा मिश्रित नतिजा निकाले पनि खेलाडी फर्ममै छन् । बरीयतामा आफूभन्दा माथिका टोलीविरुद्ध युक्रेनले राम्रो प्रदर्शन गरेको देखिन्छ ।
यता उपाधिकै दाबेदारका रूपमा हेरिएको इंग्ल्यान्डलाई गेराथ साउथगेटले प्रशिक्षण दिइरहेका छन् । साउथगेट प्रशिक्षकका रूपमा आएपछि इंग्ल्यान्डको भाग्य नै परिवर्तन भएको छ सन् २०१८ को विश्वकपको सेमिफाइनलमा पुग्नु यसको उदाहरण हो । साउथगेटले विपक्षीको रणनीति र स्तरअनुसार खेलाडी मैदानमा पठाउने गरेका छन् । सेट खेलाडीले भरिएको इंग्ल्यान्ड निकै सन्तुलित टोलीका रूपमा देखिएको छ ।
रक्षापंक्तिदेखि फिनिसिङसम्म इंग्ल्यान्डका खेलाडीले उत्कृष्ट प्रदर्शन गरेका छन् । जर्मनीविरुद्ध घाइते भएका कप्तान ह्यारी केन प्रशिक्षणमा फर्कनु इंग्लिस टोलीका लागि सुखद समाचार हो । प्रशिक्षक साउथगेटले केन, ह्यारी मागिएरे तथा किएरान ट्रिपिएरलाई प्रशिक्षण गराएका छन् । अहिले इंग्ल्यान्डको अर्को बलियो पक्ष नै गोलरक्षक जोर्डान पिकफोर्ड नै हुन् । उनले जर्मनीविरुद्ध उत्कृष्ट बचाउ गरेका थिए । युक्रेनी खेलाडीको हौसला बढाउन सरकारी अधिकारी रोम रंगशालामा उपस्थित हुने जनाइएको छ ।
रेकर्डमा इंग्ल्यान्ड बलियो
युक्रेन र इंग्ल्यान्डबीच अहिलेसम्म मैत्रीपूर्ण र मेजर अन्तर्राष्ट्रिय फुटबल प्रतियोगितामा गरी सातपटक प्रतिस्पर्धा भएको छ । जसमा इंग्ल्यान्डले युक्रेनलाई चारपटक हराउँदा युक्रेनले एकपटक बाजी मारेको छ । युक्रेनले इंग्ल्यान्डलाई दुईपटक बराबरीमा रोक्न सफल भएको छ । सन् २०१२, ११ सेप्टेम्बरमा फिफा विश्वकपको छनोट खेलमा १–१ को बराबरी रोकेको थियो । ११ सेप्टेम्बर २०१३ मै विश्वकप छनोटमै युक्रेनले इंग्ल्यान्डलाई गोलरहितमा रोक्यो ।
यसैगरी युक्रेनले इंग्ल्यान्डलाई इतिहासमै एकपटक मात्र हराएको रेकर्ड छ । सन् २०१० को विश्वकप छनोटमा युक्रेनसँग इंग्ल्यान्ड १–० ले स्तब्ध भएको थियो । त्यसवेला युक्रेनको जितमा जारेन्कोले एक मात्र विजयी गोल गरेका थिए । यी दुई टोलीबीच पहिलोपटक सन् २००० मा मैत्रीपूर्ण खेलमा प्रतिस्पर्धा भएको थियो ।
डेनमार्क सामु चेक रिपब्लिक
बाकु रंगशालामा डेनमार्क र चेक रिपब्लिक युरोकप २०२० को सेमिफाइनल प्रवेशका लागि प्रतिस्पर्धा गर्दै छन् । चेक रिपब्लिक र डेनमार्कले समूह चरण र प्रिक्वार्टरफाइनलमा अप्रत्यासित नतिजा निकाली अन्तिम आठको स्थान पक्का गरेका हुन् । सन् १९९२ को विजेता डेनमार्क योपटक असाध्यै फर्ममा छ । डेनमार्क २९ वर्षपछि युरोकपको क्वार्टरफाइनलमा पुगेको हो । सन् २००४ र २०१२ को संस्करणमा डेनमार्क पहिलो चरणबाटै बाहिरिएको थियो ।
२००८ र २०१६ मा डेनमार्क प्रतियोगितामा छनोट नै भएन । युरोकपमा सन् १९९६ को उपविजेता र २००४ को संस्करणमा सेमिफाइनलसम्म पुगेको चेक रिपब्लिक २०१६ मा पहिलो चरणबाटै बाहिरिएको थियो । फिनल्यान्डसँगको प्रतिस्पर्धामा मुख्य खेलाडी क्रिस्टियन एरिक्सन अचेत भएर मैदानमा ढेलेपछि डेनमार्कका खेलाडीमा सन्नाटा छाएको थियो ।
त्यसपछि डेनिस टोली यसरी अगाडि बढ्यो कि उसलाई रोक्न हिम्मत अरू टोलीले गर्न सकेनन् । रसियामाथि ४–१ को सनसनीपूर्ण नजितापछि प्रिक्वार्टरफाइनलमा गत संस्करणको सेमिफाइनलिस्ट वेल्सविरुद्ध ४–० को जित निकाली डेनमार्कले उपाधिको दाबेदारी प्रस्तुत गरेको छ । इंग्ल्यान्डको समूहमा रहेको चेक रिपब्लिकले प्रिक्वार्टरफाइनलमा उपाधि दाबेदारका रूपमा हेरिएको नेदरल्यान्ड्सविरुद्ध २–० को जित रच्यो । जारोस्लाभ सिल्भायको प्रशिक्षणमा रहेको चेक रिपब्लिक अहिले निकै आक्रामक रूपमा प्रस्तुत भइरहेको छ । इंग्ल्यान्डसँग समूह चरणमा १–० ले हारेपछि चेक रिपब्लिकले आफूलाई सम्हालेको देखिन्छ ।
चेक रिपब्लिकलाई क्वार्टरफाइनलसम्म पुर्याउनमा स्ट्राइकर प्याट्रिक सिकको योगदान अत्यधिक देखिन्छ । उनी प्रतियोगिताकै दोस्रो सर्वाधिक गोलकर्ता खेलाडी हुन् । उनले अहिलेसम्म चार खेलमा चार गोल गरेका छन् । डेनमार्कले आफ्नो यात्रा अगाडि बढाउनु छ भने फर्ममा रहेका स्ट्राइकर सिकलाई रोक्नु आवश्यक छ । टोमास साउसेक तथा होलेसले डेनमार्कको अगाडि मोर्चा सम्हालेका छन् । पछिल्लो खेलमा दुवैले प्रेरणदायी खेल प्रस्तुत गरेका थिए ।
रेकर्डमा डेनमार्क र चेक रिपब्लिक
डेनमार्क र चेक रिपब्लिकबीच ११ पटक आमनेसामने भएको छ । चेक रिपब्लिकले डेनमार्कलाई ६ खेलमा हराएको छ । डेनमार्कले केवल तीन खेलमा मात्र चेक रिपब्लिकलाई पाखा लगाएको छ । यी दुईबीच ६ खेल ड्रका रूपमा निस्किएको छ । यी दुई टोलीबीच अन्तिमपटक १६ नोभेम्बर २०१६ मा अन्तर्राष्ट्रिय मैत्रीपूर्ण खेलमा प्रतिस्पर्धा भएको थियो ।
जसमा दुवै टोलीले १–१ को बराबरी नतिजा निकाले । विश्वकपअन्तर्गत युरोपियन छनोटमा चारपटक भिडन्त भएको छ । जसमा दुवै टोलीले समान एक जित, हार र दुई बराबरी नतिजा आत्मसात् गरेका छन् । यसैगरी युरोकप च्याम्पियनसिपमा डेनमार्क र चेक रिपब्लिकबीच एक–एकचोटि प्रतिस्पर्धा भएको छ । दुवै टोलीले समान एक–एक जित निकालेका छन् ।
इंग्ल्यान्डको क्वार्टरफाइनल यात्रा
समूह चरण
इंग्ल्यान्ड १–० क्रोएसिया
इंग्ल्यान्ड ०–० स्कटल्यान्ड
इंग्ल्यान्ड १–० चेक रिपब्लिक
प्रिक्वार्टरफाइनल
इंग्ल्यान्ड २–० जर्मनी
युक्रेनको क्वार्टरफाइनल यात्रा
समूह चरण
युक्रेन २–नेदरल्यान्ड्स ३
युक्रेन २–१ नर्थ मेसोडोनिया
युक्रेन ०–१ अस्ट्रिया
प्रिक्वार्टरफाइनल
युक्रेन २–१ स्विडेन
