इ–व्यापार संघ नेपालले सम्बन्धित अधिकारीहरूसँग पटक–पटक छलफल गरेर आग्रह गर्दा पनि जेठ ३१ गतेसम्म जारी गरिएको निषेधाज्ञाले होम डेलिभरीलाई सहज पार्ने प्रावधानलाई पर्याप्त मात्रामा ध्यान नदिएको भन्दै आपत्ति जनाएको छ । संघले हालको प्रतिबन्धमा विशेष गरी काठमाडौं उपत्यकामा कार्य अवधि बिहान ९ बजेसम्म सीमित गर्नु र अत्यावश्यक उत्पादनहरूको परिभाषामा कुनै फेरबदल नगर्नुमा आपत्ति जनाएको हो ।
संघका अध्यक्ष सागर भट्टका अनुसार २ मिटर दूरी कायम राख्नु, डेलिभरी कामदारलाई स्यानिटाइजर, ग्लोब्स र मास्कले सुसज्जित गर्नु, उनीहरूको स्वास्थ्यलाई निरन्तर अनुगमन गर्नुजस्ता सरकारले लगाएका सुरक्षा उपायहरूलाई इ–व्यापार संघ र यसका सदस्य कम्पनीहरूले सधैँ अनुसरण गर्दै आएका छन् ।
सर्वसाधारणलाई एक सुरक्षित विकल्प प्रदान गर्दै सबै सामानहरूको होम डेलिभरी सेवालाई अनुमति दिनाले भाइरस फैलनबाट रोक्न मद्दत पुग्ने उनको भनाइ छ । यसले इ–व्यवसायमार्फत सञ्चालित धेरै साना र मध्यम व्यवसायलाई पलायन हुनबाट बचाउने र अर्थ व्यवस्थालाई निरन्तरता दिने उनको तर्क छ ।
महामारीको चापलाई कम गर्न लगाएको लकडाउन एक महिनाभन्दा बढी भइसकेकाले स्टेसनरी, मोबाइल र कम्प्युटरजस्ता सामग्रीहरू उपभोक्ताका लागि खाना र कपडाजत्तिकै आवश्यक भएको संघले जनाएको छ ।
सरकारले विद्यार्थी, कर्मचारी र समाजका अन्य सदस्यहरूका आवश्यकतालाई सम्बोधन गर्न पर्याप्त कदम नचालेको संघको दाबी छ । इ–वाणिज्य कम्पनीहरूलाई केही उत्पादन समूहहरूमा सीमित नराखी पूर्ण रूपमा वितरण सेवा सञ्चालन गर्न अनुमति दिएमा समस्या समाधान हुने र उपभोक्ताको सुरक्षा सुनिश्चित गर्ने संघले जनाएको छ ।
