उद्योग वाणिज्य तथा आपूर्ति मन्त्रालयले दैनिक उपभोग्य वस्तुको ढुवानीका साधन अनिवार्य रूपमा सबैले देख्ने गरी ढुवानी सेवा खुलाउनुपर्ने निर्णय गरेको छ । सरकारी निकाय, निजी क्षेत्रमा संगठित छाता संगठनका प्रमुख र प्रतिनिधिको संयुक्त बैठकले यो निर्णय गरेको हो । प्रयोग गरिएको सवारीसाधनमा सबैले देख्ने गरी अगाडि खाद्यान्न बोक्ने हो भने खाद्यान्न ढुवानी सेवा, फलफूल ढुवानी गर्ने भए फलफूल ढुवानी सेवा र तरकारी, दुग्धलगायत अन्य अत्यावश्यक उपभोग्य वस्तु भए त्यही वस्तुको ढुवानी सेवा भनेर उल्लेख गर्नुपर्नेछ ।
त्यस्तै, दैनिक उपभोग्य वस्तुको ढुवानीको साधनमा चालक र कामदार कर्मचारीले आफ्नो परिचयपत्रसहित प्रमुख जिल्ला अधिकारी र आफ्नो संस्था दर्ता वा आबद्ध भएको संस्थाको प्रमुखलाई सम्बोधन गरी पठाएको पत्रको एक–एक प्रति साथमा राख्नुपर्नेछ ।
त्यस्तै, दैनिक अत्यावश्यक उपभोग्य वस्तुहरूको आयात, ढुवानी, सञ्चय र वितरण गर्ने कम्पनी, उद्योग र संस्थाहरूले पनि प्रयोग गर्ने सवारीसाधनको नम्बर, किसिमलगायतका विवरण आफ्नो औपचारिक पत्रबाट प्रमुख जिल्ला अधिकारी र आफ्नो संस्था दर्ता आबद्ध भएको संस्थाको प्रमुखलाई विद्युतीय माध्यमबाट जानकारी गराउनुपर्नेछ ।
त्यस्तै ढुवानी साधनमा संलग्न कामदारको नाम, ठेगाना र मोबाइल नम्बरको विवरण पनि प्रजिअ र आफ्नो संस्था दर्ता आबद्ध भएको संस्थाको प्रमुखलाई विद्युतीय माध्यमबाट जानकारी गराउनुपर्नेछ । यसबाहेक दैनिक अत्यावश्यक उपभोग्य वस्तुहरूको ढुवानी सेवाका लागि उपयोग गरिएको सवारीमा चालक र कामदार कर्मचारीबाहेक अन्य व्यक्ति राख्न नपाइने भएको छ ।
