कोरोना भाइरसको महामारी बढेपछि सरकारले विद्यालयहरू बन्द गर भनेर निर्देशन गरे पनि लमजुङका सरकारी तथा निजी विद्यालयले नियमित विद्यालय सञ्चालन गरेका छन् । विद्यालयले आधारभूत स्वास्थ्य मापदण्डसमेत पालना गरेका छैनन् । कोभिड– १९ संकट व्यवस्थापन केन्द्र सिसिएमसीले वैशाख १३ गते सोमबारदेखि देशभरका सबै विद्यालयका परीक्षा तथा पठन–पाठन स्थगित गर्न सरकारलाई सिफारिस गरी सरकारले समेत विद्यालय बन्द गर्ने निर्णय गरिससकेको छ ।
तर, सरकारको निर्णय लत्याउँदै लमजुङका दुई पालिकाबाहेक ६ वटा पालिकामा नियमित विद्यालय सञ्चालन भइरहेको छ । सरकारकाे सबै विद्यालय र क्याम्पस बन्द गर्ने र परीक्षासमेत स्थगित गर्ने निर्णयलाई बेवास्ता गर्दै लमजुङका स्थानीय तहले विद्यालयमा पठन–पाठन गराएका हुन् ।
बेसीसहर नगरपालिकाले नगरपालिकास्तरीय कक्षा ५ र ८ वार्षिक परीक्षा २० देखि २८ गतेसम्म सञ्चालन गर्ने भएकाले विद्यार्थीलाई परीक्षाबारे जानकारी दिन विद्यार्थीलाई विद्यालय बोलाइएको बेसीसहर नगरपालिकाका शिक्षा शाखा प्रमुख किसानराज चिलुवालले बताए ।
परीक्षा सकिएपछि विद्यालय बन्द गरिने उनले बताए । जिल्लास्थित शिक्षा विकास तथा समन्वय इकाइ लमजुङका प्रमुख वीरबहादुर गुरुङले कोरोना भाइरसको दोस्राे भेरियन्टको महामारी फैलिएकाले विद्यालय बन्द गर्नुपर्ने बताए । उनले भने, ‘जिल्लाको सुन्दरबजार र मध्यनेपाल नगरपालिका विद्यालय भने बन्द गरिएको जानकारी आएको छ ।’
मध्यनेपाल नगरपालिकाले हाल बढिरहेको कोभिड– १९ को जोखिमयुक्त अवस्था र नेपाल सरकारको निर्णयलाई आत्मसात् गर्दै नगरपालिकाका सम्पूर्ण विद्यालयका भौतिक पठनपाठन अर्को निर्णय नहुन्जेल सम्मको लागि स्थगन गरिएको मध्यनेपाल नगरपालिकाका प्रमुख रमेशकुमार पाण्डेले बताए ।
लमजुङका प्रमुख जिल्ला अधिकारी होमप्रसाद लुइँटेलले लमजुङको विद्यालय तथा परीक्षा स्थगित गर्ने विषयमा डिसिसिएमसीको बैठकले कुनै निर्णय नगरेको बताए । लमजुङका सातजना बिरामीमा कोरोना भाइरस (कोभिड– १९) संक्रमण परीक्षण गर्दा एन्टिजेन पजिटिभ देखिएको छ । कोरोना संक्रमणसँग मिल्दाजुल्दा लक्षण देखिएपछि एन्टिजेन परीक्षण गरिएकोमा दुई महिला र पाँच पुरुषमा पजिटिभ देखिएको हो ।
बिरामी भएर जिल्ला अस्पताल लमजुङ आएका उनीहरूलाई कोरोना संक्रमणको लक्षण देखिएको र एन्टिजेन परीक्षण गरिएको अस्पतालले जनाएको छ । अस्पतालका प्रमुख हेमन्त श्रेष्ठका अनुसार एक साताको अवधिमा जाँच गरिएकामध्ये सातजनामा एन्टिजेन पजिटिभ देखिएको हो । उनीहरूलाई ज्वरो आउने, कडा खालको रुघाखोकी लाग्ने, बान्ता हुनेलगायतको समस्या देखिएको श्रेष्ठले बताए । केही अस्पतालमा भर्ना भएर निको भइसकेपछि घर गएका छन् भने केही एन्टिजेन परीक्षणको क्रममा पजिटिभ देखिएका छन् ।
