सहरी विकास राज्यमन्त्री रामवीर मानन्धरले भने– बाइपासलाई विवादित बनाउने काम असफल भयो
स्थानीयको विरोधका बाबजुद काठमाडौं महानगरपालिकाले सूचना केन्द्र निर्माण सुरु गरेको छ । करिब एक करोड लागतमा बालाजु बाइपासमा सुविधा सम्पन्न सार्वजनिक शौचालयसहितको सूचना केन्द्र निर्माण हुन लागेको हो ।
सहरी विकास राज्यमन्त्री रामवीर मानन्धर र काठमाडौं महानगरपालिकाका प्रमुख विद्यासुन्दर शाक्यले बुधबार संयुक्त रूपमा शिलान्यास गरेसँगै केन्द्र निर्माणको काम अगाडि बढ्ने भएको हो । बाइपासमा निर्माण हुने सूचना केन्द्रले उत्तरी क्षेत्रबाट हुने आवागमनको लगत राख्ने, सूचना केन्द्रबाट बालाजुबाट बाहिरिँदा पुगिने ठाउँ र भित्र आउँदा आवश्यक पर्ने सेवा प्राप्त हुने ठाउँका बारेमा जानकारी दिने राज्यमन्त्री मानन्धरले बताए ।
‘बाइपासलाई विवादित बनाउने प्रयास भए पनि अहिले जनताको जित भएको छ । सार्वजनिक जग्गा संरक्षण गर्नु सरकारको दायित्व हो । सार्वजनिक सम्पत्तिको संरक्षणमा सरकार सचेत छ,’ उनले भने । स्थानीयले आफ्नो भन्दै दाबी गर्दै आएको बालाजुको कित्ता नम्बर ९९ र १२५ जग्गामा सूचना केन्द्र निर्माण हुन लागेको हो ।
महानगरका अनुसार काठमाडौँबाट बालाजु नाका हुँदै बाहिरिने र भित्रिने सवारीको अभिलेखीकरण राख्ने, यातायातबारे सूचना राख्ने र सर्वसाधारणलाई काठमाडौँबारे जानकारी दिने उद्देश्यले सूचना केन्द्रको निर्माण गर्ने तयारी भएको हो । राज्यमन्त्री मानन्धरले ‘समृद्ध नेपाल सुखी नेपाली’को राष्ट्रिय आकांक्षा पूरा गर्न उपत्यकाका विभिन्न स्थानमा सरकारले अत्याधुनिक सुविधासहितका यस्ता केन्द्र स्थापना गर्ने लक्ष्य लिएको जानकारी दिए । ‘राजधानीको फोहोर व्यवस्थापनमा महानगरसँग नेपाल सरकारले सहकार्य गर्छ,’ उनले भने, ‘उपत्यकामा खानेपानी र फोहोरको समस्या चाँडै दीर्घकालीन रूपमा समाधान हुनेछ ।’
महानगर प्रमुख शाक्यले सूचना केन्द्रको निर्माणले राजधानीबाट ल्यान्डफिल्ड साइट जाने फोहोरका गाडीको लगत राख्न सहयोग पुग्ने अपेक्षा रहेको बताए । ‘सूचना केन्द्रमा उपत्यका र काठमाडौं महानगरसम्बन्धी आवश्यक सबै सूचना उपलब्ध गराइनेछ,’ उनले भने, ‘सूचना केन्द्रबाट पर्यटक र सर्वसाधारणलाई काठमाडौं र उत्तरी क्षेत्र हुँदै पुगिने नुवाकोट, रसुवा, गोरखा जाने बाटोलगायतबारे पनि सूचना दिइनेछ ।’ शाक्यले सार्वजनिक सूचना केन्द्रसँगै आधुनिक शौचालय निर्माण हुने पनि जानकारी दिए ।
सूचना केन्द्रको काम उपभोक्ता समितिमार्फत
सूचना केन्द्र निर्माणका लागि महानगरपालिकाको ९५ लाख ६० हजार र उपभोक्ताले १० लाख ६० हजार व्यहोर्ने उपभोक्ता समितिमा अध्यक्ष हरिओम मानन्धरले जानकारी दिए । कार्यक्रममा वडा नम्बर १६ का अध्यक्ष मुकुन्द रिजालले महानगरका थुप्रै ठाउँमा यस प्रकारका सूचना केन्द्र र सार्वजनिक शौचालय स्थापना गर्न आवश्यक रहेको बताए ।
सूचना केन्द्रको निर्माण कार्य उपभोक्ता समितिमार्फत भइरहेको छ । घर भत्काएर शौचालय निर्माणका लागि महानगर लागेको भन्दै स्थानीयले विरोध गरेका थिए । सो विवाद सर्वोच्च अदालतमा विचाराधीन छ । महानगरले गत वर्ष नै सार्वजनिक शौचालय बनाउने घोषणा गरेको थियो । त्यसका लागि ४० स्थान तोकेको थियो । ती ठाउँमध्ये बालाजु बाइपास पनि एक हो । बजेट विनियोजन गरे पनि आफ्नो स्वामित्वमा जग्गा नभएकाले बनाउन नसकिएको बताउँदै आएको महानगरले अहिले बालाजु बाइपासका ३८–४० वर्ष पुराना घरमा डोजर चलाएर सूचना केन्द्र निर्माणको काम थालेको हो ।
