नयाँ पत्रिका फलोअप
विद्यार्थीमाथि कक्षाकोठामै यौन दुर्व्यवहार गर्ने शिक्षक शालिकराम पोखरेलविरुद्ध जाहेरी दर्ता भएको छ । पीडित बालिकाका तर्फबाट अभिभावक गीता राईले इलाका प्रहरी कार्यालय दमकमा जाहेरी दर्ता गरेकी हुन् । कमल गाँपालिका– ३ सहिद धर्मभक्त माविका शिक्षक पोखरेल र शिव भट्टराईले अधिकांश बालिकालाई कक्षाकोठामै यौन दुर्व्यवहार गर्ने गरेको आरोप लगाएका थिए । यद्यपि एकजना अभिभावकले पोखरेलविरुद्ध मात्रै जाहेरी दिएकी हुन् । दशभन्दा बढी अन्य विद्यार्थी र अभिभावक यसअघि जाहेरी दिनका लागि आइतबार इलाका प्रहरी कार्यालय दमक आएका थिए ।
उनीहरूले जाहेरी तयारी पारेर दर्ता गर्न प्रहरी कार्यालय जाँदै गर्दा दर्ता गर्न दिइएको थिएन । विद्यालय व्यवस्थापन समिति अध्यक्ष तथा कमल– ३ का वडा सदस्य चक्रबहादुर गुरुङ र शिक्षक–अभिभावक संघ अध्यक्ष लेखनाथ खतिवडाले जाहेरी दर्ता नगरी दबाबमा फर्काएका थिए । शिक्षक पोखरेल ओली समूहमा आबद्ध भएका कारण उनका विरुद्ध जाहेरी दिन गुरुङ र खतिवडाले रोक लगाएका हुन् । गुरुङ तत्कालीन एमालेबाट निर्वाचित जनप्रतिनिधि हुन् भने अहिले ओली समूहको नेकपामा छन् । खतिवडा पनि ओली समूहको नेकपाका स्थानीय नेता हुन् ।
विद्यालय व्यवस्थापन समितिले सोमबार बिहान विद्यालयमा कार्यपालिका सदस्य, गाउँपालिका शिक्षा शाखा, अभिभावक, विद्यार्थी र शिक्षकसहितको बैठक राखेर दुवै शिक्षकलाई माफीसमेत मगाए । माफी मागेपछि शिक्षक भट्टराईले सोही विद्यालयमा पढाने सहमति भएको छ भने पोखरेललाई अन्तै सरुवा गर्ने सहमति भएको छ ।
अरू बालिका र अभिभावकले भने जाहेरी दर्ता नगर्ने प्रतिबद्धता जनाएका छन् । ‘विद्यार्थीकै मागबमोजिम सहमति भएको छ । शिव सरको विषयमा समस्या छैन उहाँले यहीँ पढाउनुहुन्छ भनेर विद्यार्थीले भने शालिक सरको विषय उहाँको पारिवारिक समस्या छ । काठमाडौं गइरहनुपर्छ । तत्काल बिदा बस्ने र आवश्यकताअनुसार काठमाडौं सरुवा जाने भन्नुभएको छ,’ कमल गाउँपालिका शिक्षा शाखा प्रमुख सूर्य न्यौपानेले भने, ‘सोमबारको बैठकमा शिक्षकहरूले अभिभावक भर पढाउने क्रममा तिमीहरूलाई चोट परेछ । यसमा क्षमता चाहन्छौँ भन्नुभयो ।’
यद्यपि राईले भने माफी माग्दैमा न्याय नपाइने भएका कारण जाहेरी दर्ता गराएको बताइन् । ‘मलाई पनि स्कुलमै मिल्नुपर्छ भन्दै थिए । तर, मलाई त्यसमा न्याय हुँदैन जस्तो लाग्यो । शालिकराम सरले मेरो नानीलाई दुर्व्यवहार गर्नुभएको रहेछ,’ उनी भन्छिन्, ‘त्यसकारण मैले उहाँविरुद्ध जाहेरी दिएको हुँ । न्याय पाने आस गरेकी छु ।’
पोखरेल विगत दुई दशकदेखि सहिद धर्मभक्त माविमा शिक्षण पेसा गर्दै आएका छन् । उनी प्रावि तहका स्थायी शिक्षक हुन् । शिक्षक नभएका कारण मावि तहमा पनि उनले नेपाली विषय अध्यापन गराउँदै आएका थिए । विगतदेखि नै विद्यार्थीलाको संवेदनशील अंग छुने, अनावश्यक शरीरमा छुने, मसार्नेलगायतका गतिविधि गर्दै आएको पीडित पीडित विद्यार्थीले गुनासो गरेको यसअघि नयाँ पत्रिका दैनिकले पटक–पटक समाचार प्रकाशन गर्दै आएको थियो ।
शिक्षक पोखरेलविरुद्ध जाहेरी परेकाले तत्काल पक्राउ गरी अनुसन्धान अघि बढाइने इलाका प्रहरी कार्यालय दमकका प्रमुख प्रहरी नायब उपरीक्षक नवराज कार्कीले जानकारी दिए । ‘एकजना शिक्षकविरुद्ध मात्र जाहेरी आएको छ । जाहेरी नआई अर्का शिक्षकलाई हामी केही गर्न सक्दैनौँ,’ उनले भने, ‘अब तत्काल पक्राउ गरेर अनुसन्धान प्रक्रिया अघि बढाइनेछ ।’
