सञ्चालनमा रहेका १९ विकास बैंकमध्ये चालू आवको दोस्रो त्रैमासको वित्तीय विवरण प्रकाशित गरेका १४ बैंकको नाफा २ अर्ब ९४ करोड पुगेको छ । यो गत आवको यही अवधिको तुलनामा १७ प्रतिशतले बढी हो । समग्रमा नाफा बढे पनि ६ वटा बैंकको नाफा घटेको छ । त्यस्तै, एउटाको नाफा ऋणात्मक रहेको छ । समस्याग्रस्त फुकुवापछि सञ्चालन भइरहेको नारायणी डेभलपमेन्ट बैंकको नाफा ऋणात्मक देखिएको हो ।
अधिकांश बैंकमा कोभिड–१९ को प्रभाव परे पनि कतिपयको खुद ब्याज आम्दानी बढेको विवरणले देखाएको छ । यसअघि उठाउन नसकेको २७ करोड ब्याज दोस्रो त्रैमासमा संकलन भएपछि नाफा बढ्न सहयोग पुगेको हो । तीन विकास बैंकले भने यो विवरण नै उल्लेख गरेका छैनन् ।
कोभिडका कारण ब्याज उठाउन समस्या परे पनि पछिल्लो तीन महिनामा ब्याज उठ्तीदर राम्रोे छ । राष्ट्र बैंकको नियमअनुसार बैंकहरूले उठाउन नसकेको ब्याज रकमको ६३ प्रतिशत नियामकीय सञ्चितिमा राख्नुपर्छ । बैंकहरूले कुल १ अर्ब २३ करोड रुपैयाँ सञ्चितिमा राखेका छन् । पहिलो त्रैमासमा १ अर्ब ५० करोड ब्याज उठ्न सकेको थिएन । यसको अर्थ असोजदेखि पुसमा भने २७ करोड ६७ लाख रुपैयाँ उठाएका हुन् । बैंकहरूले अझै १ अर्ब २३ करोड ब्याज उठाउन सकेको छैन ।
बैंकहरूले नियामकीय सञ्चितिमा राख्नुपर्ने रकम घटेपछि लगानीकर्तालाई लाभांशका रूपमा वितरण गर्न सक्ने रकममा पनि सुधार भएको छ । ११ विकास बैंकमा पहिलो त्रैमासमा वितरणयोग्य नाफा ऋणात्मक भएका चारवटाको समेत वितरणयोग्य नाफा धनात्मक भएको छ ।
असोजमा बैंकहरूले ३३ करोड ५८ लाख रुपैयाँ लाभांशका रूपमा वितरण गर्न सक्ने अवस्थामा थिए भने पुसमा १ अर्ब ८७ करोड वितरण गर्न सक्ने भएका छन् । पुससम्मको चुक्ता पुँजीका आधारमा बैंकहरूले औसतमा ५ प्रतिशत लाभांश दिन सक्ने देखिएका छन् । बैंकहरूले २ दशमलव ८२ प्रतिशतदेखि ११ दशमलव ९७ प्रतिशतसम्म लाभांश दिन सक्ने देखिएका छन् ।
यी बैंकहरूले गत आवको तुलनामा ग्राहकमा गएको कर्जा लगानी भने १४ प्रतिशतले विस्तार गरेर २ खर्ब ८३ अर्ब ८३ करोड रुपैयाँ पुर्याएका छन् । (नारायणी डेभलपमेन्टबाहेक) औसत खराब कर्जादर २ दशमलव ८८ प्रतिशतबाट घटेर २ दशमलव १७ मा सीमित भएको छ । कुल कर्जामा ६ अर्ब १६ करोड रुपैयाँबराबरको कर्जा खराब भएको हो । २९ लाख रुपैयाँ कर्जा लगानी रहेको नारायणी डेभलपमेन्टको भने ४४ प्रतिशत कर्जा खराब छ । यसअघि यस बैंकको खराब कर्जा ७३ प्रतिशत थियो ।
