म्यानमारको सत्तारुढ दल नेसनल लिग फर डेमोक्रेसी (एनएलडी)ले सेनाको नियन्त्रणमा रहेका आफ्ना नेताहरूलाई तत्काल रिहा गर्न माग गरेको छ । एनएलडीले मंगलबार वक्तव्य जारी गर्दै पार्टीकी नेतृ आङ सान सुकीसहितका नेताहरूलाई तत्काल रिहा गर्न आग्रह गरेको हो ।
स्टेट काउन्सिलरसमेत रहेकी सुकी र देशका राष्ट्रपति विन मिन्ट दुवैलाई सेनाले सोमबारदेखि नजरबन्दमा राखेको छ । एनएलडीका केन्द्रीय कार्यकारी समितिका सदस्यहरू, सांसदहरू र क्षेत्रीय मन्त्रिपरिषद्का सदस्यहरूलाई पनि गिरफ्तार गरिएको छ ।
म्यानमारको सैनिकले म्यानमारको सम्पूर्ण सत्ता एक वर्षका लागि नियन्त्रणमा लिएको घोषणा गर्दै नेताहरूलाई गिरफ्तार गरेको हो । सेनाले एक वर्षसम्मका लागि संकटकाल घोषणा गर्दै एक वर्षमा निर्वाचन गराउने दाबी पनि गरेको छ ।
गत नोभेम्बरमा सम्पन्न आमनिर्वाचनमा धाँधली भएको भन्ने सेनाको दाबीलाई अस्वीकार गरिएको तथा कोरोना भाइरसका कारण देशभित्र संकटपूर्ण अवस्था रहेकाले आमनिर्वाचन स्थगित गर्न सरकार अक्षम भएपछि सैनिक नियन्त्रण आवश्यक रहेको सेनाको भनाइ छ ।
सेनाको असन्तुष्टिबीच भएको निर्वाचनबाट गठित नयाँ संसद्को बैठक सुरु हुने दिन बिहान सेनाले सत्ता विद्रोह गरेको हो । सेनाले राजनीतिक नेताहरूलाई सैनिक नियन्त्रणमा राख्ने र सञ्चार सम्पर्क विच्छेद गरेकोमा सर्वत्र विरोध भएको छ ।
अमेरिका, अस्ट्रेलिया र अन्य मुलुकले विज्ञप्ति प्रकाशन गरी म्यानमरको पछिल्लो अवस्थाप्रति चिन्ता प्रकट गरेका छन् । उनीहरूले म्यानमारको सेनालाई कानुनी शासनको सम्मान गर्न आग्रह गरेका छन् । हाल म्यानमारमा सर्वाधिक प्रभावशाली नेताको रूपमा ७५ वर्षीया आङ सान सुकी नै रहेकी छिन् । सैनिक शासनविरुद्ध दशकौँ संघर्ष गरेपश्चात् पाँच वर्षअघि शान्तिपूर्ण रूपमा सम्पन्न निर्वाचनबाट उनले मुलुकको नेतृत्व सम्हालेकी थिइन् ।
गत नोभेम्बरको चुनावबाट संसद्को तल्लो र माथिल्लो दुवै सदनका कुल चार सय ७६ स्थानमध्ये सुकीको दल एनएलडीले तीन सय ९६ स्थान जितेको छ । सन् २००८ को संविधानबमोजिम सेनालाई संसद्को कुल स्थानको २५ प्रतिशत छुट्याइएको छ । साथै कतिपय महत्वपूर्ण मन्त्रालय पनि सेनालाई नै दिइएको थियो ।
तर, गत चुनावमा व्यापक धाँधली भएको सेनाको दाबी छ । त्यसका ठोस प्रमाणहरू भने सेनाले फेला पारेको छैन । यहाँको निर्वाचन आयोगले पनि गत साता सेनाको उक्त दोषारोपणलाई अस्वीकार गरेको थियो ।
यही असन्तुष्टिको आडमा सेनाले शासन लिएकाले म्यानमारको राजनीतिक केही समय संकटपूर्ण नै रहने देखिएको छ ।
