लमजुङ उद्योग वाणिज्य संघको अध्यक्षमा लोकतान्त्रिक पक्षका गुणराज सिलवाल निर्वाचित

मंगलबार, २८ पुष, २०७७
डिजिटल संस्करण

जिल्लासँगै इकाइमा पनि लोकतान्त्रिक समूह नै विजयी

व्यवसायीहरूको छाता संगठन लमजुङ उद्योग वाणिज्य संघको अध्यक्षमा लोकतान्त्रिक पक्षका गुणराज सिलवाल निर्वाचित भएका छन् । सिलवाल संघको १७औँ अधिवेशनबाट आगामी तीनवर्षे कार्यकालका लागि अध्यक्षमा निर्वाचित भएका हुन् । 

उनले प्रगतिशील समूहका प्रतिस्पर्धी श्रीकृष्ण लामिछानेलाई तीन सय १४ मतले पछि पार्दै जित हासिल गरेका हुन् । सिलवालले कुल एक हजार तीन सय ५९ मत पाए भने लामिछानेले एक हजार ४५ मत प्राप्त गरे । 

सिलवाल बेसीसहर इकाइको सदस्य हुँदै दुई कार्यकाल संघको कोषाध्यक्ष, एक कार्यकाल तृतीय उपाध्यक्ष र एक कार्यकाल द्वितीय उपाध्यक्ष भई काम गरेका थिए । 

यस्तै संघको प्रथम उपाध्यक्षमा लोकतान्त्रिक पक्षका मृगेन्द्र घिमिरे निर्वाचित भएका छन् । उनले निकटतम् प्रतिद्वन्द्वी विकास श्रेष्ठलाई १५९ मतले पछि पार्दै निर्वाचित भएका छन् । घिमिरेले कुल एक हजार दुई सय ४९ मत पाएका छन् । 

संघको द्वितीय उपाध्यक्षमा लोकतान्त्रिक पक्षका भरतकुमार श्रेष्ठ विजयी भएका छन् । उनले निकटतम् प्रतिद्वन्द्वी भरतबहादुर विष्टलाई तीन सय २२ मतको अन्तरले जित हासिल गरेका हुन् । श्रेष्ठले कुल एक हजार तीन सय ३५ मत पाएका छन् । 

यस्तै, संघको तृतीय उपाध्यक्षमा लोकतन्त्रप्रेमी युवा व्यवसायी कृष्णजंग गुरुङ अत्यधिक मतका साथ विजयी भएका छन् । गुरुङले निकटतम् प्रतिद्वन्द्वी रविन विश्वकर्मालाई चार सय १८ मतले पछि पारेका छन् । गुरुङले कुल एक हजार तीन सय ८६ मत पाए । 

महिला सदस्यमा लोकतान्त्रिक समूहकै आइशा मियाँ र मनु पन्त विजयी भएका छन् । उनीहरूले क्रमशः एक हजार दुई सय ८७ र एक हजार एक सय ९५ मत ल्याएका छन् । निकटतम् प्रतिद्वन्द्वी अनुपमा पुन र कल्पना थापाले क्रमशः एक हजार पाँच र एक हजार ७८ मत ल्याएका छन् । 

यस्तै, संघको खुला सदस्यहरू पनि सबै लोकतान्त्रिक पक्ष नै विजयी भएका छन् । खुला सदस्यमा उक्त समूहका शिवराम सिलवाल, सुरेशकुमार प्रधान र प्रदीप बस्नेतले उम्मेदवारी दिएका थिए । उनीहरूले क्रमशः एक हजार दुई सय ५२, एक हजार दुई सय ८८ र एक हजार दुई सय ७४ मत ल्याएका छन् । निकटतम् प्रतिद्वन्द्वीहरू युवराज पौडेल, सुरजकुमार श्रेष्ठ र वेदराज खनियाँले क्रमशः एक हजार ५३, नाै सय ६४ र नाै सय ७३ मत ल्याए । 

यस्तै, संघको सातवटा इकाइमा पनि लोकतान्त्रिक पक्षधर व्यवसायीको जित भएको छ । बेसीसहर, उदीपुर, भोटेवडार, सुन्दरबजार, राइनास, दुईपिप्ले सोतीपसल र भोर्लेटार इकाइमा लोकतान्त्रिक समूहका सबै उम्मेदवार विजयी भएका छन् । 

खुदी इकाइमा भने सहमतिका आधारमा नयाँ समिति चयन गरिएको छ । बेसीसहर इकाइमा विपिन श्रेष्ठ, उदीपुरमा अमृतकुमार श्रेष्ठ, भोटेवडारमा मानकृष्ण आचार्य, सुन्दरबजारका दण्डबहादुर सुनार, राइनासमा आनन्द श्रेष्ठ, दुईपिप्ले सोतीपसलमा ऋषिराम पुरी र भोर्लेटारमा जाकिरहुसेन मियाँ रहेका छन् । 

संघमा दुई हजार ६ सय ८४ व्यवसायी आबद्ध भए पनि निर्वाचनमा भने कुल दुई हजार चार सय ६७ मत खसेको थियो । केन्द्रमा केपी शर्मा ओली र प्रचण्ड–नेपाल गुटमा लागेका नेता तथा कार्यकर्ताहरू विभाजन भए पनि जिल्लामा भने उनीहरू एक भएर अघि बढेका थिए । 

संघको निर्वाचनमा पनि विभाजित नहुन व्यवसायीलाई नेतृत्वले ह्विप नै जारी गरेको थियो । लमजुङमा लोकतान्त्रिक समूह र प्रगतिशील समुहका व्यवसायीबीच चुनावी प्रतिस्पर्धा भएको थियो । 

नेपाली कांग्रेस लमजुङका सभापति भेषबहादुर पौडेलले निर्वाचित सबैलाई बधाई ज्ञापन गर्दै व्यवसायसँगै कांग्रेसको मर्मलाई नबिर्सन आग्रह गरे । 

संघका निवर्तमान अध्यक्ष राजेश थापाले जिल्लामा लोकतन्त्रप्रेमीहरूको जित भएको बताए । संघको नवनिर्वाचित अध्यक्ष सिलवालले आगामी दिनमा व्यवसायीको हितमा रहेर काम गर्ने प्रतिबद्धता जनाएका छन् । आगामी कार्यकालका लागि शनिबार भएको निर्वाचनको मतगणना सोमबार राति सकिएको हो ।  

सुझावित समाचार