सन् २०१० मा अमेरिकाको गोप्य सूचना सार्वजनिक गरेपछि विश्वभर चर्चामा आएका विकिलिक्सका सञ्चालक जुलियन असान्ज अझै बेलायतकै जेलमा रहने भएका छन् । पछिल्लो समय अमेरिकाले उनलाई फिर्ता ल्याएर कारबाही अघि बढाउने तयारीसहित कानुनी प्रक्रिया सुरु गरेको थियो ।
यद्यपि, उक्त प्रयासमा बेलायतको एक अदालतले असान्जलाई अमेरिका फर्काउनु सुरक्षित नरहेको निर्णय सुनाएको छ । वेस्टमिस्टर म्याजिस्ट्रेट कोर्टका न्यायाधीश भेनेस्सा बारइटसरको यो निर्णयसँगै उनी अझै बेलायतको जेलमै रहने भएका हुन् ।
असान्जले जेलमै आफूलाई सुरक्षित महसुस गरेका छन् । सन् २००६ मा अमेरिकामा विकिलिक्सको सुरु गरेका अस्टे«लियन नागरिक असान्जले अमेरिकाको धेरै गोप्य सूचना बाहिर ल्याएका थिए । उनले अमेरिकी सेनामार्फत पाएको आधिकारिक गोप्य सूचनाहरू सार्वजनिक गरेका थिए । त्यससँगै अमेरिकाले थप कारबाहीका लागि उनलाई फिर्ता ल्याउने प्रयास गरिरहेको छ । यद्यपि, त्यसमा सफलता मिलेको छैन । अमेरिकासँगै अरू केही देशले पनि आफूलाई पक्राउ पुर्जी जारी गरेपछि असान्जले लन्डनस्थित इक्वेडरको दूतावासमा शरण लिएका थिए ।
इक्वेडरले आफ्नो दूतावासमा शरणार्थीको रूपमा उनलाई बस्न दिएको थियो । यद्यपि, केही समयपछि इक्वेडरका अधिकारीहरूले नै प्रहरीलाई बोलाएर जिम्मा लगाएका थिए । त्यससँगै उनी बेलायतको जेलमा छन् ।
न्यायाधीश बारइटसरले उनलाई अमेरिका फर्काइँदा उनी आफैँले आफैँलाई मार्न सक्ने सम्भावना देखिएको तर्क गरेकी छिन् । अमेरिकाले बेलायती अदालतको यो निर्णयविरुद्ध पुनरावेदन गर्ने भएको छ । आफ्नोबारेको मुद्दाको सुनुवाइका लागि कालो सुट र मास्क लगाएर अदालतमा उपस्थित भएका असान्जले भने कुनै पनि प्रतिक्रिया दिन मानेनन् ।
उनी सन् २०१९ देखि बेलायतको जेलमा छन् । त्यसअघि उनी सात वर्ष लन्डनस्थित इक्वेडरको दूतावासमा शरणार्थीको रूपमा बसेका थिए । अमेरिकाले असान्जलाई आफ्नो अतिगोप्य सूचनाहरू ‘ह्याक’ गरेको र तीनलाई सार्वजनिक गरेको आरोपमा देशमै फर्काएर अनुसन्धान र कारबाही गर्ने तयारी गरेको छ ।
असान्जका वकिल इद फिजल्यान्डले उनलाई आफ्ना समर्थकहरूले बेलायतमै बस्ने व्यवस्था गरिदिने प्रस्ताव गरेका थिए । फिजल्यान्डका अनुसार समर्थकहरूले असान्जलाई लन्डनमा एउटा घरको व्यवस्था गरिदिने, जहाँ उनी आफ्नी श्रीमती र नानीहरूसँगै गोप्य रूपमा बस्न सक्ने भनेका थिए ।
अदालतले जेलमै बस्ने निर्णय सुनाएपछि असान्जले पनि राहत महसुस गरेको वकिल फिजल्यान्डले बताएका छन् । ‘तपार्इंको निर्णयले सबै कुरा परिवर्तन गरिदिएको छ । यो निर्णयपछि कुनै फरक कदम उठाउने सम्भावना रहेन,’ उनले भनेका छन् ।
