अघिल्लो प्रतिनिधिसभा निर्वाचनमा दुनियाँलाई छक्क पार्दै निर्वाचनको मत परिणाम आफ्नो पक्षमा पार्न सफल भएका हुम्लाका छक्कबहादुर लामालाई कार्यकर्ताले साथ छाडेका छन् ।
पुष्पकमल दाहाल ‘प्रचण्ड’लाई छक्काएका लामालाई जिल्लाका अगुवा नेता र कार्यकताले साथ छोडेपछि उनी अहिले एक्लिएका छन् ।
शनिबार बालुवाटारमा प्रधानमन्त्री ओलीको आश्वासनमा एकैदिनमा कित्ता परिवर्तन गरेका लामालाई जिल्लाका कार्यकताले साथ छोडेपछि लामा एक्लिएको नेकपा हुम्लाका अध्यक्ष लालकेश जैसीले जानकारी दिए ।
लामा प्रधानमन्त्री ओलीको पक्षमा उभिएपछि कार्यकताहरूले साथ छोडको अध्यक्ष जैसीले बताए । लामाका स्वकीयसचिव नेत्र महताराले पनि लामाले बालुवाटार रोजेपछि उनीसँगको सम्बन्ध टुटेको बताए ।
आफन्तको गुनासो : सत्तालिप्सामा सहिदको रगत बिर्सिए
छ्क्कबहादुर लामा सहिद परिवारका सदस्य पनि हुन्। आफ्नो इतिहास भुलेर प्रधानमन्त्री ओली पक्षमा उभिएका लामाले सहिदको रगत बिर्सिएको आफन्त कार्चेन लामाले गुनासो गरे । छक्क लामालाई अध्यक्ष प्रचण्ड र नेपाल समूह नछोड्न आग्रह गरे पनि उनले नमानेकाे आफन्तको गुनासो छ ।
पूर्वमाओवादीको ठूलो तप्का र पूर्वएमालेको समेत समर्थनमा स्वतन्त्र निर्वाचन जितेपछि प्रचण्डकै पहलमा पार्टीको कारबाही फुकुवा पाएका छक्कबहादुरलाई ओलीले दिने भनेकाे मन्त्रीको प्रलोभनमा प्रचण्डको साथ छोडेको बुझिएको छ । प्रचण्डको साथ छोडेपछि सामाजिक सञ्जालदेखि जिल्लाभर उनको आलोचना बढेकाे छ ।
