नेपाल कम्युनिस्ट पार्टी (नेकपा)को स्थायी कमिटी बैठक सुरु गर्न अध्यक्ष एवं प्रधानमन्त्री केपी ओलीको प्रतीक्षामा अन्य रहेका छन् ।
काठमाडौंको धुम्बाराहीस्थित पार्टी कार्यालयमा बैठकका लागि अरू सदस्यहरू आइपुगेको भए पनि प्रधानमन्त्री ओली नआइपुगेका कारण प्रतीक्षा गरिरहेको एक सदस्यले जानकारी दिए ।
यस बैठकमा नेकपाका अध्यक्षद्वय केपी ओली र पुष्पकमल दाहालले बेग्लाबेग्लै रूपमा राखेका राजनीतिक प्रतिवेदनबारे छलफल हुने एक सदस्यले जानकारी दिए ।
यसअघि दुवै अध्यक्षले पार्टीको सचिवालय बैठकमा आ–आफ्नो प्रतिवेदन राखेका थिए । जसमा उनीहरूले एक–अर्कामा व्यक्तिगत आक्षेपहरूसमेत लगाएका छन् ।
नेकपाको स्थायी कमिटीमा कुल ४५ सदस्य रहने व्यवस्था छ ।
जसमा सभामुख भइसकेपछि अग्निप्रसाद सापकोटाले राजीनामा दिएका छन् ।
त्यसैगरी यौन दुर्व्यवहारको आरोपपछि सभामुखबाट राजीनामा दिएका कृष्णबहादुर महरालाई अझैसम्म पनि स्थायी कमिटी सदस्यमा पुनर्वहाली गरिएको छैन । यसरी हेर्दा अहिले ४३ जना सदस्य रहेको स्थायी कमिटी रहेको छ ।
