नेकपाको स्थायी कमिटी बैठक पार्टी कार्यालय धुम्बाराहीमा सुरु भएको छ। तर, बैठकमा प्रधानमन्त्री एवं नेकपा अध्यक्ष केपी ओली अनुपस्थित छन् ।
प्रधानमन्त्री ओली बालुवाटारमै छन् । पार्टीका अर्का अध्यक्ष पुष्पकमल दाहाल प्रचण्डले बैठकको अध्यक्षता गरिरहेका छन्। दिउँसो एक बजे बोलाइएको बैठक आधा घण्टा ढिलागरी सुरु भएको हो ।
शनिबार बसेको सचिवालय बैठकले दुवै अध्यक्षका प्रस्तावलाई स्थायी कमिटीमा लैजाने निर्णय गरेअनुरूप आजकाे बैठक बाेलाइएकाे हो ।
शनिबार बसेको सचिवालय बैठकले ओलीको असहमतिबीच आइतवार स्थायी कमिटी बैठक र त्यसका एजेन्डा तय गरेको थियो ।
ओलीले सचिवालय बैठकमा सहमति जुटाएर मात्र स्थायी कमिटी बैठक बोलाउनुपर्ने अडान राखेका थिए । तर, बहुमत सदस्यले विवादको समाधान स्थायी कमिटीमै छलफल गरेर खोज्ने अडान राखेपछि आइतवारका लागि बैठक तय भएको हो ।
पार्टीभित्रको विवाद टुंग्याउन तथा सचिवालयमा दुई अध्यक्षले पेश गरेको फरक फरक प्रतिवेदनमाथि छलफलका लागि स्थायी कमिटी बैठक बोलाइएको हो।
आजको बैठकमा दुवै अध्यक्षका प्रतिवेदन र पत्र वितरण गरिनेछ । त्यसपछि सदस्यहरुलाई अध्ययनका लागि केही दिन समय दिएर अर्को बैठकको मिति तय हुने बताइएको छ । बैठकको बिचमा अनौपचारिक संवाद भने अगाडि बढाइने नेताहरुले बताएका छन् ।
त्यसैबीच स्थायी कमिटी बैठक स्थल रहेको केन्द्रीय कार्यालय आसपास सुरक्षा व्यवस्था कडा पारिएको छ । मंगलवारको सुरक्षा खतराको कारण देखाएर धुम्वाराहीमा बस्ने भनिएको सचिवालय बैठक प्रधानमन्त्रीको सरकारी निवास बालुवाटार सारिएको थियो ।
