खाद्य व्यवस्था तथा व्यापार कम्पनी लिमिटेडका डिपोमा धान बिक्री गर्ने किसानको भिड लाग्न थालेको छ ।
भिड बढ्दा धान बिक्रीका किसानले लागि तीन–चार दिनसम्म पालो पाउन सकेका छैनन् ।
धनगढीको मोहनपुरमा रहेको खाद्यको डिपोमा पुगेका किसानले चार दिनसम्म धान बेच्ने पालो नपाएको गुनासो गरेका छन् ।
कञ्चनपुरको बेलौरी नगरपालिका– ८ का किसान खेमानन्द राना तीन दिनदेखि खाद्यको गोदामको गेटमा धान राखेर पालो पर्खिरहेका छन् ।
आफ्नै ट्याक्टरमा ३० क्विन्टल धान लिएर आएका उनी राति ट्याक्टरमै सुत्छन् । धान छोडेर घर फर्कने अवस्था पनि नरहेको उनले बताए ।
‘टाढा भएकाले घर जाने अवस्था पनि छैन । ट्रयाक्टर र धान छोडेर कसरी जानु ?’ उनले भने, ‘राम्रो मूल्य पाइने आसले आएको, निकै सास्ती पाइयो ।’ खान र बस्नको समस्या भएको उनले बताए । ३० बिघामा खेती गर्दै आएका उनी ट्रयाक्टर थ्रेसिङको काम पनि गर्छन् ।
बेलौरीकै भागीराम राना पनि धान बेच्ने पालो कुरेर तीन दिनदेखि गोदाममै बसेका छन् ।
स्थानीय व्यापारीले प्रतिक्विन्टल २१ सय रुपैयाँभन्दा बढी मूल्य नदिएपछि उनी १५ क्विन्टल धान लिएर खाद्यको डिपोमा पुगेका हुन् ।
दुई रात ट्रयाक्टरमै सुतेको उनले बताए । मल, बिउ पाउन मात्र नभई उत्पादन गरेको उपज बेच्न पनि किसानले सास्ती खेप्नुपरेको रानाको गुनासो छ ।
‘भोलि शनिबार डिपो बन्द हुन्छ होला । तीन दिन भइसक्यो अहिलेसम्म पालो पाइएको छैन,’ शुक्रबार दिउँसो खाद्यको प्रांगणमा भेटिएका उनले भने, ‘मल लिन लाइनै लाग्नुपर्ने, धान बेच्न पनि लाइन लाग्नुपर्ने । हामी किसानलाई दुःख छ ।’
खाद्यले मोटो धान प्रतिक्विन्टल २७ सय ३५ रुपैयाँमा खरिद गरिरहेको छ । स्थानीय व्यापारीभन्दा राम्रो मूल्य पाएपछि धान बिक्रीका लागि खाद्यको डिपोमा किसानको भिड लागेको छ ।
कञ्चनपुरको सीमावर्ती क्षेत्रबाट पनि किसानहरू धान बिक्रीका लागि धनगढीको डिपोमा आउने गरेका छन् ।
कञ्चनपुरमा महेन्द्रनगरमा मात्र खाद्यको डिपो रहेकाले बेलौरी, पुनर्वास र कृष्णपुर नगरपालिकाबाट किसान धान बिक्री गर्न आइरहेका खाद्यले जनाएको छ ।
धान बेच्ने पालो पाउन ढिलो हुँदा कतिपय किसान गोदामको प्रांगणमा धानको थुप्रोमै सुत्ने गरेका छन् ।
धनगढीमा भन्दा टीकापुरको डिपोमा किसानको बढी भिड रहेको खाद्य व्यवस्था तथा व्यापार कम्पनी लिमिटेड धनगढीमा प्रमुख अनिलकुमार श्रेष्ठले बताए । जनशक्तिको कमी र धान राख्ने ठाउँ नहुनुले पनि ढिलो हुँदा किसानले पालो पर्खनुपर्ने अवस्था रहेको उनले बताए ।
खाद्यले कैलालीमा धनगढी, टीकापुर, शक्ति, जोशीपुर, भजनीमा डिपो राखेर धान खरिद सुरु गरेको छ । १७ कात्तिकबाट खरिद सुरु गरिएकोमा हालसम्म करिब २४ हजार क्विन्टल धान खरिद गरिएको प्रमुख श्रेष्ठले जानकारी दिए ।
खाद्यले यस वर्ष कैलालीमा ६५ हजार क्विन्टल धान खरिद गर्ने लक्ष्य लिएको छ । खाद्यले ढिलो गरी खरिद सुरु गरेपछि कतिपय किसानले भने व्यापारीलाई सस्तोमै धान बिक्री गरिसकेका छन् ।
