कोरोना भाइरसको अति उच्च जोखिममा परेका उपत्यकाका कोभिड अस्पतालमा अमेरिका–नेपाल मेडिकल फाउन्डेसनले तीन हजार थान गुणस्तरीय एन ९५ मास्क उपलब्ध गराएको छ । फाउन्डेसनले जोखिममा रहेका स्वास्थ्यकर्मीका लागि भन्दै सोमबार मास्क उपलब्ध गराएको हो ।
फाउन्डेसनका नेपाल अध्यक्ष डा. भूपेन्द्रकुमार बस्नेतको अगुवाइमा वीर अस्पताल, त्रिवि शिक्षण अस्पताल, पाटन अस्पताल, सशस्त्र प्रहरी अस्पताल, टेकु अस्पताल, प्रसूति गृह र निजामती अस्पताललाई प्रतिअस्पताल चार सय थान नघट्ने गरी मास्क दिइएको हो ।
सिंगापुरस्थित थ्री एम कम्पनीले उत्पादन गरेको एन ९५ मास्क तीन हजार थान उपलब्ध गराएको अध्यक्ष डा. बस्नेतले बताए । पछिल्लो समय निजी अस्पतालको तुलनामा सरकारी अस्पतालमा चिकित्सक तथा स्वास्थ्यकर्मी संक्रमण हुने दर बढी छ ।
‘स्वास्थ्य सेवा प्रवाहको स्तर पनि सरकारीमै बढी छ, त्यसैले त्यहाँका स्वास्थ्यकर्मीलाई संक्रमण हुनबाट जोगाउन सकियो भने महामारीमा महत्वपूर्ण योगदान होला,’ डा. बस्नेतले भने । फाउन्डेसनले ११ लाख रुपैयाँको मास्क हस्तान्तरण गरेको जनाएको छ ।
