राष्ट्रिय मानव अधिकार आयोगले डा. गोविन्द केसीको स्वास्थ्य अवस्था एवं नेपाल सरकारसँग विगतमा भएका सम्झौताको कार्यान्वयन अवस्था सम्बन्धमा जानकारी गराउन पत्राचार गरेको छ । आयोगले बुधबार प्रेस विज्ञप्ति जारी गर्दै भनेको छ, ‘डा. केसीको स्वास्थ्य अवस्था सम्बन्धमा आयोगको बागमती प्रदेश कार्यालयको टोलीले महाराजगन्जस्थित शिक्षण अस्पताल पुगी अनुगमन गरेको छ । निजको स्वास्थ्य अवस्था सम्बन्धमा नेपाल सरकारबाट चासोका साथ नहेरिएको अनुगमनका क्रममा पाइएको छ । आयोगले डा. गोविन्द केसीको स्वास्थ्य अवस्था एवं नेपाल सरकारसँग विगतमा भएका सम्झौताहरूको कार्यान्वयन अवस्था सम्बन्धमा जानकारी गराउन नेपाल सरकारलाई पत्राचार गरेको छ ।’
केसीको स्वास्थ्य अवस्था अत्यन्तै चिन्ताजनक बन्दै गइरहेको भन्दै आयोगले ध्यानाकर्षण भएको बताएको छ । त्यस्तै, आयोगले भनेको छ, ‘वार्ता र संवादको माध्यमबाटै कुनै पनि समस्याको समाधान हुने भएकाले त्यसतर्फ समयमै सार्थक पहल गरी निजको जीवनरक्षा गर्न आयोग नेपाल सरकारलाई आग्रह गर्दछ । साथै, आफ्ना मागहरू पूरा गराउन आमरण अनशनजस्तो जीवन नै जोखिममा पर्न सक्ने जटिल विकल्प नरोज्न पनि आयोग अनशनरत डा. केसीलाई आग्रह गर्दछ ।’
