भूमि व्यवस्था, सहकारी, संघीय मामिला तथा सामान्य प्रशासन मन्त्रालयले आगामी असोज ९ गतेदेखि ११ गतेसम्म देशका विभिन्न स्थानमा अत्यधिक वर्षा हुन सक्ने पूर्वानुमानपछि सबै स्थानीय तहलाई उच्च सतर्कता अपनाउँदै आवश्यक पूर्वतयारी गर्न आग्रह गरेको छ।
मन्त्रालयअन्तर्गतको विपत् व्यवस्थापन तथा सामाजिक समावेशीकरण शाखाले मौसम विज्ञान विभाग तथा राष्ट्रिय विपत् जोखिम न्यूनीकरण तथा व्यवस्थापन प्राधिकरणबाट प्राप्त पूर्वानुमानका आधारमा देशभरका स्थानीय तहलाई पत्राचार गरी सम्भावित विपत् जोखिम न्यूनीकरण तथा पूर्वतयारीमा जुट्न आग्रह गरेको हो।
मन्त्रालयले असोज ९ गतेदेखि ११ गतेसम्म अत्यधिक वर्षा हुन सक्ने भएकाले वर्षाका कारण उत्पन्न हुन सक्ने विपतको जोखिम तथा सम्भावित क्षति न्यूनीकरणका लागि उच्च सतर्कताका साथ रहन स्थानीय तहलाई आग्रह गरेको छ।
पत्रमार्फत उक्त अवधिमा स्थानीय तहमा कार्यरत कर्मचारीलाई बिदामा नबस्न तथा प्रमुख प्रशासकीय अधिकृतहरूलाई मन्त्रालयसँग नियमित सम्पर्कमा रहन आग्रह गरिएको छ।
त्यस्तै, स्थानीय विपद् व्यवस्थापन समितिको बैठक बसी आवश्यक पूर्वतयारी गर्न तथा त्यससम्बन्धी जानकारी मन्त्रालयमा पठाउन भनिएको छ।
सम्भावित जोखिमलाई ध्यानमा राख्दै स्थानीय तहका जोखिमयुक्त स्थान तथा बस्तीमा रहेका नागरिकलाई तत्काल सुरक्षित स्थानमा स्थानान्तरण गर्ने व्यवस्था मिलाउन पनि मन्त्रालयले आग्रह गरेको छ। साथै, सामुदायिक भवन, विद्यालयलगायतका संरचनालाई आवश्यक परेको अवस्थामा अस्थायी आश्रयस्थलका रूपमा प्रयोग गर्न सक्ने गरी तयारी अवस्थामा राख्न भनिएको छ।
मन्त्रालयले सम्भावित विपतका बारेमा नागरिकलाई समयमै जानकारी गराउन वडा कार्यालयमार्फत माइकिङ, स्थानीय एफएम तथा सामाजिक सञ्जालबाट सचेतनामूलक सूचना प्रवाह गर्नसमेत स्थानीय तहलाई आग्रह गरेको छ।
