जिल्ला अस्पताल धनकुटामा रक्तसञ्चार सेवा केन्द्र सञ्चालनमा आएको छ। वि.सं. १९७० सालमा स्थापना भएको जिल्ला अस्पताल धनकुटामा अस्पताल स्थापना भएको ११३ वर्षपछि पहिलोपटक रक्तसञ्चार सेवा केन्द्र सञ्चालनमा आएको हो । करिब डेढ दशकअघि पनि ब्लड बैंक सञ्चालनको प्रयास भएको थियो । तर, नियमित सञ्चालन हुन सकेन ।
लामो प्रयासपछि मापदण्ड पूरा गरी औपचारिक रूपमा सञ्चालनमा ल्याइएको रक्तसञ्चार सेवा केन्द्रको कोशी प्रदेशका स्वास्थ्यमन्त्री इन्द्रमणि पराजुलीले उद्घाटन गरे । रक्तसञ्चार सेवा केन्द्र जिल्ला अस्पताल धनकुटा र नेपाल रेडक्रस सोसाइटी धनकुटाले संयुक्त रूपमा स्थापना गरेका हुन् ।
रक्तसञ्चार केन्द्रको उद्घाटन गर्दै स्वास्थ्यमन्त्री पराजुलीले रक्तसञ्चार सेवा केन्द्रलाई निरन्तर र प्रभावकारी रूपमा सञ्चालन गर्न सबै पक्षको साथ र सहयोग आवश्यक रहेको बताए ।
जिल्ला अस्पताल र रक्तसञ्चार केन्द्रबिच महत्त्वपूर्ण सम्बन्ध रहेको उल्लेख गर्दै उनले ऐतिहासिक धनकुटा अस्पतालको सेवा विस्तारका लागि केन्द्र सञ्चालन हुनु महत्त्वपूर्ण उपलब्धि भएको पनि बताए । आवश्यक मापदण्डअनुसार भवन, जनशक्ति र उपकरणको व्यवस्था भएपछि रक्तसञ्चार सेवा सुरु गरिएको अस्पतालले जनाएको छ ।
जिल्ला अस्पताल धनकुटामा अहिले ५० शय्यामा सञ्चालनमा रहे पनि राज्यबाट भने १५ शय्याका लागि मात्र आवश्यक सेवा, सुविधा र जनशक्ति उपलब्ध हुँदै आएको छ । प्रारम्भिक चरणमा आवश्यक बजेट जुटेपछि रक्तसञ्चार सेवा सञ्चालन गर्न सम्भव भएको अस्पताल विकास समितिका अध्यक्ष निरेन तामाङले बताए ।
रक्तसञ्चार सेवा केन्द्र सञ्चालनका लागि २४सै घण्टा परिचालन हुने गरी चारजना प्राविधिक तथा कर्मचारीको व्यवस्था गरिएको छ भने आवश्यक उपकरणसमेत तयारी अवस्थामा राखिएको छ । रक्तसञ्चार केन्द्रका लागि मापदण्डअनुसार चारकोठे भवन निर्माण गरिएको छ ।
