सन् २०२७ को एसिया कप क्रिकेट प्रतियोगितामा एसिसी प्रिमियरबाट एक मात्र राष्ट्र छनोट हुने प्रावधान रहेको छ । प्रिमियम कपको विजेता मात्र एसिया कपमा पुग्नेछ । यही लक्ष्य साकार बनाउन मलेसियामा अहिले चार राष्ट्रबिच सेमिफाइनलमा भिडन्त सुरु हुँदै छ । नेपालले बलियो ओमानविरुद्ध बिहीबार प्रतिस्पर्धा गर्नेछ । युएईले पाँचपटक एसिया कप खेलिरहेको हङकङविरुद्ध खेल्नेछ ।
सन् २०२३ को एसिया कपमा स्थान बनाउँदा नेपालले युएईलाई हराएको थियो । नेपाल पहिलोपटक एसिया कपमा छनोट हुँदा भारत र पाकिस्तानजस्तो विश्व च्याम्पियनविरुद्ध प्रतिस्पर्धा गर्न अवसर पाएको थियो । त्यसवेला रोहित पौडेलको कप्तानीमा नेपाल छनोट भएको थियो । अब भने सन्दीप लामिछानेको कप्तानीमा रहेको नेपालले तीन वर्षअघिको सफतला दोहोर्याउने योजनामा अगाडि बढिरहेको छ ।
तर, नेपालको यात्रा त्यति सहज भने छेन । पछिल्लो समयमा ओमानले नेपालविरुद्ध ब्याटिङ र बलिङमा उत्कृष्ट प्रदर्शन गरिरहेको छ । विशेष गरी, आइसिसी विश्वकप लिग २ मा ओमान नेपालभन्दा अगाडि छ । विश्वकप लिग २ मा नेपाल सातौँ स्थानमा रहँदा ओमान शीर्ष चारभित्र रहेको छ । ओमानको एकदिवसीय मान्यता लगभग सुरक्षित रहेको छ । तर, नेपालको चार वर्षको अस्थायी एकदिवसीय मान्यता धर्मराएको छ ।
मलेसियामा नेपालले समूह ‘ए’ मा लगातार तीन खेल जितेर एक अगाडि नै सेमिफाइनल स्थान बनाएको थियो । नेपालले तीन खेलमा जित निकाल्दा बलिङ हाबी देखिन्थ्यो । ब्याटिङमा भने नेपाल अझै पनि एकनासको प्रदर्शन गर्न सकिरहेको छैन । ओमान निर्णायक खेलमा युएईसँग ४९ रनले पराजित हुँदा पनि रनरेटको आधारमा अन्तिम चारमा पुगेको थियो । उत्कृष्ट रनरेट भएका कारण ओमान सम्हू ‘बी’मा दोस्रो भयो । कतार र कुवेत समूह चरणबाटै बाहिरियो ।
लगातार तेस्रोपटक फाइनलको लक्ष्यमा नेपाल
एसिसी प्रिमियर कपमा नेपालको पहिलो लक्ष्य लगातार तेस्रोपटक फाइनल खेल्नु हो । यसअघि भएका दुई संस्करणमा पनि नेपाल फाइनलमा पुगेको थियो । सन् २०२३ र २०२५ मा रोहितको कप्तानमा नेपाल अन्तिम दुईमा पुगेको थियो । दुई फाइनलमध्ये एकमा जित र हार सामना नेपालले गर्यो । संयोग कस्तो रह्यो भने दुवै फाइनलमा नेपालको प्रतिद्वन्द्वी युएई नै थियो । सन् २०२३ मा एसिसी प्रिमियर कप नेपालमा भएको थियो । नेपालले मूलपानी मैदानमा भएको फाइनलमा युएईलाई हराउँदै पहिलोपटक एसिया कप खेल्न छनोट भएको थियो । गत संस्करणमा फाइनलमा युएईसँग पराजित हुँदा नेपाल छनोट भएन । नेपालले लगातार दुई खेल जित्दा दोस्रोपटक एसिया कप खेल्नेछ । यसपटक १० राष्ट्र सहभागी हुँदा च्याम्पियन हुने मात्रै एसिया कप खेल्नेछ ।
ओमानको मिश्रित प्रदर्शन
चालू एसिया कपमा ओमानको प्रदर्शन मिश्रित रहेको छ । ब्याटिङमा राम्रो गर्दा ओमानको बलिङ कमजोर भएको देखिन्छ । समूह ‘बी’को निर्णायक खेलमा ओमानले धारिलो बलिङ गर्दै युएईलाई केवल १९२ रनमा रोकेको थियो । तर, ओमानले ब्याटिङमा दमदार प्रदर्शन गर्न सकेन । सहज लक्ष्य पछ्याएको ओमान १४३ रनमै रोकियो । ओमानले कुवेतविरुद्ध २५२ रन बनाएको थियो । सो खेलमा कुवेत चार विकेटले विजयी भयो । ओमानले कतारबाट पाएको २७२ रनको लक्ष्य पाँच विकेट गुमाउँदै जितेको थियो । ब्याटिङ र बलिङमा एकनास प्रदर्शन गर्न नसकेको ओमानले सम्भवतः नेपालविरुद्ध फरक रणनीतिका साथ प्रदर्शन गर्नेछ । ओमान अक्सर नेपालको महत्वपूर्ण यात्रामा तगारो रूपमा रहेको छ ।
हेड टु हेडमा नेपाल अगाडि
एसिसी प्रिमियर कपमा अहिलेसम्म नेपाल र ओमानबिच १५ पटक प्रतिस्पर्धा भएको छ । जसमध्ये नेपालले नौ र ओमानले ६ खेलमा जित निकालेको छ । यी दुईबिचको प्रतिस्पर्धामा अहिलेसम्म सर्वाधिक योगफल नेपालले ३१० रन बनाएको छ । प्रत्युत्तरमा ओमानले ३०५ रन बनाएको थियो । ब्याटिङमा ओमानका जेसन मक्सुदले नेपालविरुद्ध ३२१ रन जोडेका छन् । नेपालका आसिफ सेखले ओमानविरुद्ध २९५ रन बनाएका छन् । नेपालका कप्तान सन्दीपले ओमानविरुद्ध ३५२ रन खर्चँदै २५ विकेट लिएका छन् । ओमानका अकिब इलियासले २०७ रनमा नेपालका ११ विकेट हात पारेका छन् ।
