युरोपेली फुटबलको सर्वोच्च निकाय (युइएफए)ले मंगलबार च्याम्पियन्स लिगअन्तर्गत सुरुवाती चरणका सबै खेलअघि भोटेकोशी विनाशकारी बाढीमा परी मृत्यु भएकाप्रति एक मिनेट मौनधारण गर्ने भएको छ । विनाशकारी बाढी तथा त्यसबाट प्रभावितप्रति ऐक्यबद्धता जनाउँदै युइएफएले च्याम्पियन्स लिगका खेलअघि एक मिनेट मौनधारण गर्ने जनाएको छ । नयाँ सिजनको च्याम्पियन्स लिग मंगलबार रातिबाट सुरु हुँदै छ । यसअघिको लिगमा पेरिस सेन्ट जर्मेन (पिएसजी)ले आर्सनललाई हराउँदै उपाधि जितेको थियो ।
युइएफएका अध्यक्ष अलेक्जान्डर चेफेरिनले यस साता हुने सबै युइएफए च्याम्पियन्स लिगका खेलअघि बाढीपीडितको सम्मानमा मौनधारण गरिने बताएका छन् । ‘तपाईं एक्लो हुनुहुन्न, नेपाल’ भन्ने सन्देशसहित युइएफएले नेपाली जनताप्रति गहिरो समवेदना र समर्थन व्यक्त गरेको छ । चेफेरिनले युरोपेली फुटबल परिवार यस दुःखद घडीमा नेपालसँग एकजुट भएर उभिने बताएका छन् । ‘विपत्तिबाट प्रभावित नेपाली जनताले संकटबाट बाहिर निस्कने क्रममा शक्ति र धैर्य प्राप्त गरून्,’ उनले भनेका छन् ।
युइएफएको यस निर्णयले नेपालको विपत्तिप्रति अन्तर्राष्ट्रिय खेल क्षेत्रबाट समेत ऐक्यबद्धता र समर्थन जनाइएको छ । ‘नेपालका जनताप्रति गहिरो समवेदना र समर्थन व्यक्त गर्न एकसाथ उभिनेछौँ । यस दुःखद घटनापछि पुनस्र्थापनाको यात्रामा उनीहरूलाई शक्ति र धैर्यको कामना गर्दछौँ,’ चेफेरिनले भने ।
रियलले इन्टरमिलानको सामना गर्ने
च्याम्पियन्स लिग २०२६/२७ को नयाँ सिजनकै समूह चरणमा दुई पूर्वविजेताबिच प्रतिस्पर्धा हुँदै छ । उद्घाटन खेलमा च्याम्पियन्स लिगका सर्वाधिक विजेता स्पेनिस क्लब रियल म्याड्रिडले सिरी ‘ए’ क्लब इन्टरमिलानको सामना गर्नेछ । यसपटक लिगको पोसेसनमा रियल म्याड्रिड २७औँ र इन्टरमिलान १४औँ स्थानमा छन् । पोल पोसेसनमा साबिक विजेता पिएसजी २३औँ र इंग्लिस क्लब म्यानचेस्टर सिटी १९औँ स्थानमा रहेको बिबिसीले जनाएको छ । म्यानचेस्टर युनाइटेड, २०औँ, नेपोली २१औँ र पिएसभी २२औँ स्थानमा छन् । पहिलो चरणमा म्यानचेस्टर सिटीले पोर्चुगल क्लब पोर्टोको सामना गर्नेछ । यसैगरी भिल्लारियलले बोरुसिया डर्टमन्डविरुद्ध खेल्नेछ ।
