चौतर्फी विवादबिच जिआनो इन्फान्टिनोले पुनः फिफा अध्यक्षमा लड्ने घोषणा गरेका छन् । फिफाको नयाँ कार्यसमितिको निर्वाचन अर्को वर्षको मार्चमा हुँदै छ । उम्मेदवारीका लागि अन्तिम नाम दर्तामिति १८ नोभेम्बरसम्म छ । इन्फान्टिनोले दुई महिनाअघि फिफा विश्वकपलगायत अन्य महत्वपूर्ण फुटबल प्रतियोगिताको २० प्रतिशत शेयर निजी कम्पनीलाई दिने घोषणा गरेका थिए । यो घोषणासँगै युरोप तथा एसियाले फिफा अध्यक्षको खुलेर विरोध जनाए । युरोप तथा एसिया फुटबल महासंघले इन्फान्टिनोको पछिल्लो घोषणाले फुटबल धराशयी हुने दाबी गरेका थिए ।
इन्फान्टिनोले तत्कालै पदबाट राजीनामा दिनुपर्नेसम्मको दबाब थियो । तर, अमेरिकी राष्ट्रपति डोनाल्ड ट्रम्पको साथ पाएका इन्फान्टिनोले विभिन्न किसिमको विवाद झेल्दै आफू फेरि पनि फिफाको अध्यक्ष पदमा लड्ने बताएका छन् । सन् २०१६ देखि फिफाको नेतृत्व सम्हाल्दै आएका इन्फान्टिनोले विश्वमा फुटबललाई नयाँ उचाइ पुर्याउने लक्ष्यका साथ निर्वाचनमा जाने जनाएका हुन् । पोल्यान्डमा चलिरहेको महिला यू–२० विश्वकप दौरान आयोजित पत्रकार सम्मेलनमा उनले आफू सन् २०३१ सम्म फिफा अध्यक्ष हुने जनाए ।
अन्तर्राष्ट्रिय मिडियाले इन्फान्टिनोसमक्ष भविष्यबारे प्रश्न राखेका थिए । त्यसको प्रत्युत्तरमा उनले भने, ‘तपाईंहरू ढुक्क हुनुहोस्– म सन् २०३१ सम्म फिफा अध्यक्षमै रहनेछु ।’ इन्फान्टिनोको भनाइ पुष्टि गर्न जुरिचमा रहेको फिफाको मुख्य कार्यालयबाट सोमबारै विज्ञप्ति जारी गरी निर्वाचनमा वर्तमान अध्यक्ष लड्ने जानकारी दिएएको छ । ‘आगामी फिफा अध्यक्षका लागि हुने निर्वाचनमा इन्फान्टिनोले पुनः उठ्ने घोषणा गरेका छन्,’ विज्ञप्तिमा भनिएको छ, ‘यो घोषणा गत अप्रिलमै भइसकेको थियो । यसमा कुनै परिवर्तन भएको छैन, उनी चुनावी मैदानमा उत्रिनेछन् ।’
१०६ राष्ट्रको समर्थन आवश्यक
फिफा अध्यक्ष बन्न त्यति सहज छैन । यसका लागि उम्मेदवारले फिफामा आबद्धमध्ये लगभग ५० प्रतिशत समर्थन प्राप्त गर्नुपर्छ । फिफामा अहिले २११ फुटबल संघका सदस्य छन् । यसमध्ये कम्तीमा १०६ राष्ट्रले समर्थन गर्नुपर्छ । यो समर्थन प्राप्त गर्न नसकिए उम्मेवार निर्वाचन प्रक्रियामा अगाडि बढ्न सक्दैन । अहिले उत्तर अमेरिकी फुटबल महासंघका अध्यक्ष भिक्टर मोन्टाग्लियानीलाई बलियो प्रतिस्पर्धीका रूपमा लिइएको छ । इन्फान्टिनोको २० प्रतिशत सेयर बिक्री विवाद बढेपछि युरोपले उत्तर अमेरिकाका अनुभवी भिक्टरलाई भावी अध्यक्षका रूपमा अगाडि सारेको छ । यद्यपि, भिक्टरले अहिलेसम्म केही उत्तर दिएका छैनन् । तर, युरोप भने पूरै शक्ति लगाएर उनलाई उठाउने योजनामा लागेको बिबिसीले जनाएको छ ।
बेल्जियमको समर्थन फिर्ता
इन्फान्टिनो विवादमा तटस्थ बसेको बेल्जियमले सोमबार अध्यक्षमा दिएको समर्थन फिर्ता लिएको छ । द रोयल बेल्जियम फुटबल एसोसिएसनले आगामी निर्वाचनअघि नै इन्फान्टिनोलाई दिइएको समर्थन फिर्ता गरेको जनाएको छ । ‘फिफामा चर्को भ्रष्टाचार गर्ने व्यक्तिलाई आउँदो दिनमा समर्थन हुनेछैन,’ बेल्जियम फुटबलले जारी गरेको विज्ञप्तिमा भनिएको छ, ‘हामीहरूको चाहना फिफा स्वच्छ र पारदर्शी होस् ।’ यसअघि इंग्ल्यान्ड, स्कटल्यान्ड, वेल्स र आयरल्यान्डका फुटबल संघहरूले इन्फान्टिनोलाई दिएको समर्थन फिर्ता लिएका छन् ।
फिफाले युइएफएमाथि आफ्नो नेतृत्वविरुद्ध ‘भ्रामक प्रचार’ गरेको आरोप लगाएको छ । अर्कोतर्फ, युइएफएले यसको विरुद्ध फिफाको आर्थिक योजनाविरुद्ध अमेरिकामा कानुनी प्रक्रिया सुरु गरेको छ । स्विट्जरल्यान्डमा आपराधिक उजुरी हाल्ने चेतावनीसमेत युइएफएले दिएको छ ।
