भदौ १० गते रसुवासहित नेपालको चार जिल्ला प्रभावित हुने गरी आएको विनाशकारी बाढीमा बेपत्ता महोत्तरीको पिपरा गाउँपालिका– ३ घर भई त्रिशूली ३ ‘ए’मा कार्यरत इन्जिनियर विकासकुमार यादवका परिवारले उनको शीघ्र खोजी गरिदिन सरकारसँग आग्रह गरेको छ ।
श्रीमानसँगै बाढीको वेला रसुवामै रहेकी श्रीमती इन्द्रा यादवले श्रीमान् कोठाबाट अलि टाढा रहेको ३ ‘ए’को टनेलभित्रको अफिसमा गएको र टनेलभित्रैबाट नास्ता खाइरहेको वेला फोनमा सम्पर्क गरेको केही बेरमै बाढी आएको बताइन् । श्रीमानसँग अन्तिम कुरा टनेलभित्रै भएको र टनेलभित्र अक्सिजन सप्लाईसहित बस्नेसम्मको सुविधा भएकोले श्रीमान् फर्कने आस अझै नमरेको बताउँछिन् । उनी सरकारले उद्धारमा ढिलो गरेको आरोप लगाउँछिन् ।
यता बेपत्ता भएका इन्जिनियर विकासका बुबा शम्भुनाथ यादव छोराको खोजीको लागि सरकारले अझै संयन्त्रहरूको प्रयोग गर्नुपर्ने बताउँछन् । टनेलभित्र ४० देखि ४२ जना इन्जिनियरहरूको टोलीसहित थप केही कर्मचारी भएकाले सरकारले आफ्नै सन्तानझैँ अरूको सन्तानको सुरक्षा गरिदिनुपर्ने बताउँछन् ।
त्यस्तै ससुरा विजय यादव भारतलगायतका देशहरूले प्राविधिकसहितको टोली पठाउने सुरुमा गरेको प्रस्तावलाई प्रधानमन्त्रीले नमानेकै कारण बाँच्न सक्नेहरूरुको समेत आस डुबेको बताउँछन् । बाढीले बगाएर बेपत्ता भएका वा मृत्युवरण गरेकाबाहेक विभिन्न स्थानमा फसेकाहरूको सरकारकै ढिलासुस्तीले ज्यान जाने वा गएको ज्यानको जिम्मा सरकारकै हुने उनको भनाइ छ ।
