नेपाल एसोसिएसन अफ टुर एन्ड ट्राभल एजेन्ट्स (नाटा)का नवनिर्वाचित अध्यक्ष भरतजंग पाण्डेले नयाँ सोच र नयाँ कार्यशैलीसहित संस्थागत सुधारको बाटोमा अघि बढाउने जिम्मेवारी र अवसर आएको बताएका छन्।
निर्वाचित भएपछि सञ्चारकर्मीसँग कुराकानी गर्दै उनले भाषण गर्ने मात्रै नभई सुन्ने र त्यसअनुसार काम गर्ने जिम्मेवारी आएको बताए। ‘निर्वाचित हुनु भनेको पुनः नयाँ विद्यालयमा प्रवेश गरेजस्तै भएको छ,’ उनले भने, ‘मेरो लागि सबैभन्दा ठूलो परीक्षा पनि हो र राम्रो गर्न सुनौलो यात्रा गर्ने अवसर आएको छ।’
पाण्डेका अनुसार निर्वाचन अभियान यसपटकको प्रतिस्पर्धा अरू निर्वाचनभन्दा केही फरक देखियो। न ठूलो भोजभतेर, न त अनावश्यक भीडभाड। न शक्ति प्रदर्शनको होड, न त तडकभडक। साथीभाइसँग सामान्य छलफल, भेटघाट र संवादमार्फत आफ्ना एजेण्डा मतदातासम्म पुर्याउने प्रयास भएको उनले बताए।
पाण्डेले मतदातालाई आफ्ना एजेण्डा सुनाउने मात्र गरेनन्, उनीहरूका कुरा पनि सुने। नाटा परिवारभित्रका समस्या, अपेक्षा र संस्थालाई परिवर्तन गर्नुपर्ने विषयमा निरन्तर सुझाव लिए।
निर्वाचनका क्रममा उनले संस्थामा देखिएका कमजोरीप्रति पनि गम्भीर चासो राखे। ‘बिग्रिएपछि सुधार्ने’ भन्दा ‘बिग्रिन नदिन सचेत हुने’ सोच आवश्यक रहेको उनले धारणा राखे।
पाण्डेको बुझाइमा नाटा एउटा निर्वाचनबाट आउने र जाने नेतृत्वको संस्था मात्र होइन। पर्यटन तथा ट्राभल व्यवसायीहरूको साझा आवाज, व्यावसायिक हितको प्रतिनिधि र नेपालको पर्यटन क्षेत्रसँग जोडिएको महत्वपूर्ण संस्था हो।
उनका लागि चुनौती निर्वाचनका बेला सुनेका आवाजलाई निर्णयको आधार बनाउने, संस्थाभित्रको एकतालाई बलियो बनाउने, व्यवसायीका समस्या समाधानका लागि प्रभावकारी पहल गर्ने र नाटाको संस्थागत क्षमता अझ मजबुत बनाउने हो।
पाण्डेको अनुसार नाटाको नेतृत्व पद प्राप्त गर्ने विषय मात्र होइन, संस्थाको भविष्य निर्माण गर्ने जिम्मेवारी हो।
निर्वाचित भएसँगै उनले नाटालाई केवल वर्तमानमा मात्र चलाउने नभई इतिहासले सम्झने गरी संस्थाको महत्व र गरिमा कायम राख्ने उल्लेख गरे। नाटाको शुक्रबार भएको ५९औँ निर्वाचनमा १८८ मत प्राप्त गरी उनी निर्वाचित भएका हुन्।
