राष्ट्रिय स्वतन्त्र पार्टीबाट निर्वाचित बर्दिया क्षेत्र नम्बर १ का सांसद ठाकुरसिंह थारूले बर्दियाका बस्तीहरूमा सरकारको उपस्थिति खोजेका छन् । प्रतिनिधिसभाको बैठकमा बोल्दै सांसद थारूले बर्दियाका बस्तीहरूमा सरकारको उपस्थिति खोजेका हुन् ।
संसदमा बर्दियाको समस्या राख्दै सांसद थारूले आफूले बर्दियाको कथा बोकेर फेरि पनि उपस्थित भएको बताए । उनले कृषि, खानेपानी, ऊर्जा, स्वास्थ्य, शिक्षा र पूर्वाधार विकासमा समस्या रहेको भन्दै बर्दियामा सरकारको उपस्थिति खोजे ।
‘खेतमा मल छैन । भान्सामा ग्यास छैन । ४१ डिग्री गर्मीमा पंखा चल्ने बिजुली छैन। ट्यांकी छ, पानी छैन । सडक छ, ग्राभेल छैन, अस्पताल छ आइसियू छैन । विद्यालयमा शिक्षक छैन,’ उनले भने, ‘सभामुख महोदय, बर्दियाका बस्तीहरूमा सरकारको उपस्थिति खोइ ?’
संविधानले ग्यारेन्टी गरेका यी मौलिक अधिकारबारे अब सदनमा रुखो बोलिरहनु नपरोस् भन्दै उनले बर्दियाका समस्या राखेका थिए ।
